Îro dê di merasimekê de bi awayekî fermî deriyê Zêt-Girane yê di navbera Herêma Kurdistanê û Tirkiyê de bê vekirin.
Şaredarê Rûbarokê Ekrem Çetinkaya li ser sînor ji Rûdawê re axivî û ragihand, ew kêfxweş in ku îro Deriyê Sînor ê Zet-Girane yê Navneteweyî dikeve xizmetê û got, “Hem ji aliyê Tirkiyê û hem jî ji aliyê Kurdistanê ve amadekariyeke gelekî baş hatiye kirin. Gelê me pir kêfxweş e. Dê îro ji her du aliyan ve derî ji hatin û çûnê re bê vekirin.”
Çetinkaya diyar kir ku gelek ji xelkê Colemêrgê xizmên wan li Herêma Kurdistanê hene û diyar kir, “Nîvê eşîra me li aliyê din e. Li Hewlêr, Duhok, Diyana û Akrê xizmên me hene. Dê ev der bibe wek deriyê Zaxoyê."
Çetinkaya amaje bi çalakbûna her du deriyê sînor ên Xabûr û Serzêrê kir ku hatin û çûn li her du deriyan berdewam dike û got, bi deriyê nû dê rêya çûnûhatinê ya navbera Hewlêr û Colemêrgê kurt bibe.
Di berdewamiya axaftina xwe de Şaredarê Rûbarokê anî ziman ku xebatên asfaltkirina rêya di navbera her du aliyan de berdewam dikin û spasiya wan aliyan kir ku di vekirina deriyê sînor ê nû de ked dane.
Endamê Encûmena Şaredariya Şemzînanê Mehmet Şerîf Bay jî ji Rûdawê re axivî û got, ji bo vekirina rê ev demeke dirêj e dixebitin.
Mehmet Şerîf Bay got, “Vekirina vê rêyê dê bi kêrî hemû aliyan bê. Berê ez çûm Deriyê Sînor ê Xabûrê, em 8 saetan li ber derî man.”
