Wezareta Karên Derve ya Tirkiyeyê li ser bombebaranên Îsraîlê yên li Sûriyeyê daxuyaniyeke nivîskî belav kir.
Wezareta Karên Derve ya Tirkiyeyê di daxuyaniyê de got:
“Daxuyaniyên provokatîf ên wezîrên Îsraîlê yên li dijî welatê me, ne tenê rewşa wan a giyanî, her wiha siyasetên êrişkar û dagirker ên hikûmeta fundamentalîst û nijadperest a Îsraîlê jî nîşan dide.
Divê were pirsîn, çima pêşhatên li Sûriye û Libnanê ku hêviyeke mezin didin aştî, aramî û refahê ya ji bo herêma me û ji aliyê tevahiya cîhanê ve tên piştgirîkirin, Îsraîlê aciz dikin.
Tevî ku ti provokasyon yan jî êrişeke li dijî wê li qada Sûriyeyê nîne, êrişên hewayî û bejahî yên Îsraîlê yên doh bi şev, ji têgihiştina siyaseta derve ya Îsraîlê ku ji şer û pevçûnê xwedî dibe pê ve ti raveyên din nînin.
Ne mimkun e ku wezîrên Îsraîlî bi hedefkirina Tirkiyeyê cenosîda ku li Xezeyê dikin, şerê giştalî yê li dijî gelê Filistînê, terora niştecihan, niyeta dagîrkirina Şerîaya Rojava û armancên dagirkeriyê yên li pişt êrişên li ser Sûriye û Libnanê veşêrin.”
Wezareta Karên Derve ya Tirkiyeyê her wiha anî ziman:
“Bi êrişên xwe yên ku temamiya erdnîgarî û yekîtiya neteweyî ya welatên herêmê dikin armanc, Îsraîl bûye gefa herî mezin a ji bo ewlehiya herêma me.
Îsraîl wekî destabilîzatoreke stratejîk hem dibe sedema aloziyê li herêmê û hem jî terorê xwedî dike.”
Artêşa Îsraîlê doh balafirgeh û baregehên leşkerî yên Sûriyeyê bombebaran kirin ku di nava wan de T4a ku dê Tirkiye lê bi cih bûbûya jî hebû.
