Serokê Giştî yê Partiya Zaferê Umît Ozdag ku li ser heqaretkirina li Serokkomarê Tirkiyeyê lêpirsîn li dijî wî hatibû vekirin, li Enqereyê hat desteserkirin.
Serokê Giştî yê Partiya Zaferê Umît Ozdag ku bi gotin û helwesta xwe ya nijadperest tê naskirin.
Birêvebiriya Parêzgeha Stenbolê ya Partiya Zaferê jî nûçeya desteserkirinê piştrast kir.
Roja duşemê li dijî Ozdag bi tohmeta heqaretkirina li serokkomar lêpirsîn hatibû destpêkirin.
Di daxuyaniya Serdozgeriya Komarê ya Stenbolê de hat ragihandin ku ev lêpirsîn ji ber gotinên ku Ozdag roja berê derheqê Serokkomarê Tirkiyeyê Recep Tayyip Erdogan de anîbûn zimên hatiye destpêkirin.
Serdozgeriyê di daxuyaniya xwe de destnîşan kir ku gotinên Ozdag heqaret û gef in.
Ozdag çi gotibû?
Ozdag di Civîna Şêwirmendiya Serokên Parêzgehan a Partiya Zaferê de ku roja 19ê Kanûna Paşîn li Antalyayê pêk hatibû wiha gotibû:
"Ez piştrast im ku, zerera ku Erdogan û AKPyê daye miletê Tirk û dewleta Tirk ti Şerê Xaçparêzan ê di 1000 salên dawî de pêk hatiye nedaye. Ti Şerê Xaçparêzan nikaribûye sixûran têxe nav dewleta Tirk."
Ozdag îdia kir ku di serdema Erdogan de beşeke mezin a miletê Tirk "ji ber kesên ku bi navê Xwedê xelkê dixapînin ji dînê xwe sar bûne" û got ku di serdema Erdogan de "rêjeya deîst û ateîstan ji sedî 16 derbas kiriye."
Ozdag her wiha ev gotin jî bi kar anîbûn: "Erdogan bi belavkirina dewleta miletê Tirk di nav terîqet û cemaetan de, bi hevparkirina dewletê bi kesên ku şirkê tînin, zererê dide baweriya miletê Tirk û bi derbaskirina bi milyonan penaber û koçberên neyasayî ji bo nav Anatolyayê, çanda miletê Tirk têk dibe. Ya ku çêdibe di rastiyê de faşîzmeke AKPyê ye."
