DAIŞê li Babê 2 tangên artêşa Tirkiyê bidest xistin

Li gorî agahiyên ji çavkaniyên Artêşa Sûriyê a Azad (ASA) ve hatine bidestxistin, şerê di navbera DAIŞê û Artêşa tirk û ASAyê de li Babê di 121emîn roja Operasyona Mertalê Firatê de berdewam dike.

Di operasyonan de îro DAIŞê bi wesayitên bombekirî êrîşa xwekujî li ser Artêşa tirk û ASAyê pêk anî. Di saetên êvarê de wesayita bombebarkirî ya DAIŞê ji hêla leşkerên tirk ve hate ruxandin. Herwiha ji ber xefkên mayinê operasyon bi giranî berdewam dike.

​Di vê navberê de li rojavayê Babê, DAIŞê 2 tang, buldozer û wesayiteke bizirx bidest xist. Ev agahî di ajansa Amaqê a DAIŞê de jî cî girt.

Li bakurê rojhilatê Babê jî DAIŞê bi fuzeyeke ajoker tangeke tirk rûxand. Di encama rûxandinê de tang bê bandor bû û leşkerî di nava tangê de birîndar bû.