Li gelek herêmên Bakurê Kurdistanê, berf û şilî berdewam dikin û bandoreke neyînî li jiyana rojane dikin.
Şaredariya Bajarê Mezin a Wanê ragihand ku li parêzgehê ji ber berfê rêyên 492 gundan hatibû girtin û di encama xebatan de 439 rê hatine vekirin û ji bo vekirina rêya 53 gundan jî xebat berdewam in.
Li parêzgeha Mûşê jî piştî barana gur berfê dest pê kir.
Sekreterê Giştî yê Îdareya Taybet a Mûşê Şeyhmus Yentur diyar kir ku li tevahiya parêzgehê ji ber berfa zêde rêyên 55 gundan hatibû girtin û piştî xebatan 52 rê hatine vekirin.
Şeyhmus Yentur got, “Ji bo welatî mexdûr nebin tîmên me ji bo vekirina rêyên 3 gundan xebatên xwe berdewam dikin û ji bo rêwşên bilez jî tîm hatine amadekirin.”
Îdareya Taybet a Colemêrgê jî da zanîn, ji ber berfê roja pêştir rêyên 74 gundan hatibûn girtin û di encama xebatan de rêyên 65 gundan hatine vekirin.
Tîmên berfê ji bo vekirina rêyên 9 gundan xebatên xwe didomînin.
Tîmên Rêveberiya Rêyênbêjahî jî li ser rêya Colemêrg û Geverê di amadebaşiyê de ne.
Rêvebirê Xizmetên Rê û Veguhestinê ya Îdareya Taybet a Bedlîsê Umît Kurtkan ragihand ku li tevahiya parêzgehê ji ber berfa zêde rêyên 60 gundî hatibûn girtin û 45 ji wan hatine vekirin.
Umit Kurtkan ragihand ku xebatên vekirina rêyên 15 gundan berdewam dikin.
Li Bedlîsê tîmên şaredariyê û Rêveberiya Rêyênbêjahî jî berfa li ser cade û kolanan paqij dikin.
