Genel Energyê di daxuyaniya xwe de ragihand ku bi biryara ku ji Dadgeha Navneteweyî ya Tehkîmê ya Londonê wergirtiye, dê ji ber karên xwe yên derengmayî yên li du qadên petrolê zêdetirî 26 milyon dolaran tazmînatê bide Hikûmeta Herêma Kurdistanê.
Genel Energya ku li Borsaya Londonê qeydkirî ye û navendeke wê li Tirkiyeyê ye, 2yê Kanûna Paşîn a 2024an li dijî Hikûmeta Herêma Kurdistanê serî li Dadgeha Navneteweyî ya Tehkîmê ya Londonê dabû.
Li gorî daxuyaniya şirketê, bi biryara ku îro ji dadgehê derketiye hat diyarkirin ku divê Genel Energy 26 milyon û 826 hezar û 905 dolarên Amerîkî tazmînatê bide.
Li gorî biryara dadgehê, ji ber ku şirketê li gorî şertên peymana xwe ya bi Hikûmeta Herêma Kurdistanê re tevnegeriyaye û karên xwe yên di qadên petrolê de dereng xistiye ev biryar hatiye dayîn.
Dema ku Hikûmeta Herêma Kurdistanê di dawiya sala 2021ê de peymanên bipêşxistina qadên petrolê yên Mîran û Bina Bawiyê bi Genel Energyê re hilweşandin nakokiya hiqûqî dest pê kir.
Hat ragihandin ku ev biryar ji ber ku şirketê nikarî şertên peymanê wekî ku hatibû pêşbînîkirin pêk bîne hat dayîn.
Piştî hilweşandina peymanan, Genel Energyê li Dadgeha Navneteweyî ya Tehkîmê ya Londonê doz li dijî Hikûmeta Herêma Kurdistanê vekir û daxwaza tazmînat a 1,75 milyar dolarên Amerîkî kir.
Lê belê dadgehê bi biryareke li gorî berjewendiyên Hikûmeta Herêma Kurdistanê doz bi encam kir û mafê Hewlêrê dît ku peymanan hilweşîne.
Faîza ji sedî 2ya ji bo dayîna derengketinê
Di destpêkê de Hikûmeta Herêma Kurdistanê ji şirketê daxwaza tazmînateke 36 milyon dolarî kir.
Lê belê dadgehê, miqdarê ku divê bê dayîn wekî 26 milyon û 868 hezar û 905 dolar diyar kir.
Her wiha, ji bo her meha ku şirket deynê xwe derengiyê bixe, divê faîza ji sedî 2 lê zêde bibe.
Qada petrolê ya Mîranê di nava sînorên Parêzgeha Silêmaniyê de li nêzîkî Taslûcayê ye lê qada Bina Bawiyê li derdora navçeya Teqteqê ya parêzgeha Hewlêrê ye.
