Li Dihokê xwepêşandan li dijî biryarên hikûmeta Iraqê bi rê ve çû

Bi hezaran welatiyên Dihokê îro, ji bo protestokirina biryarên Bexdayê yên li dijî Herêma Kurdistanê û şehîdkirina ciwanên Kurd ên li Kerkûkê, li Parka Newrozê kom bûn.

Di nava xwepêşandanê de pêkahate, sendîka û saziyên cuda, cuda beşdar bûn.

Xwepêşanderan ji hikûmeta Îraqê xwest ku pabendî yasaya bûdceyê û destûra bingehî bibe.

Herwiha xwepêşanderan ji hikûmeta Bexdayê xwest ku rêkeftinên xwe yên bi Hikûmeta Herêma Kurdistanê re cîbicî bike.

Di xwepêşandanê de, daxwaznameyek hate xwendin û organîzatorên xwepêşandanê ew daxwazname radestî aliyên fermî yên parêzgeha Duhokê kir.

Parêzgarê Dihokê Elî Teter jî di xwepêşandanê de amade bû û got:

Em hatine daxwaza mafê xwe bikin. Ev daxwaziyên ku di vê xwepêşandanê de radestî me hatine kirin em dê bidin balyozxane û aliyên siyasî.”

Hikûmeta Herêma Kurdistanê dicive

Sibe Hikûmeta Herêma Kurdistanê dicive û biryarê li ser qebûlkirin an jî redkirina wan 500 milyar dînaran dide, ku Hikûmeta Îraqê ji bo Herêma Kurdistanê dişîne.