Şêwirmendê Asayişa Herêma Kurdistanê Mesrûr Barzanî derbarê biryaya Serokê Amerîkayê Donald Trump ya ragirtina vîzeyê ji welatiyên Herêma Kurdistanê û Iraqê re ragihand, em bi zorê bûne Iraqî û ji ber Iraqbûnê jî em tên cezakirin.
Di daxuyaniyekê de ji bo rojnameyeke amerîkî, Şêwirmendê Asayişa Herêma Kurdistanê Mesrûr Barzanî wek amajeyek bi hewl û gavên berdewam bo serxwebûna Kurdistanê ragihand, Kurd bi mana xwe di Iraqê de cezayê dixwin.
Mesrûr Barzanî got: “Ew hêza ku zêdetir qurbanî di şerê terorê de daye û bi gotina berpirsên pilebilind yên Amerîka, Kurd nêzîktirîn hevpeymanê Amerîka ye, baca mana di çarçoveya Iraqê de dide”.
Barzanî destnîşan kir: “Pêşmerge take hêz e ku şerê DAIŞê dike û heta niha li ser heman çeperê mil bi milê Amerîka şerê heman dijminî dike, di baweriya min de ne tiştekî rast û durist e ku dewletek ya netewek baca şaş ya çend kesên din bide.”
Serokê Amerîkayê Donald Trump hefteya borî biryara ragirtina dana vîzeyê bi welatiyên 7 welalên îslamî da û di nava wan welatan de Iraq jî heye.
Di dema hilbijartina Serokê Amerîka Donald Trump de ragihandibû, hêza Pêşmerge take hêz e ku bi azayetî şerê DAIŞê dike û daxwaz ji rayedarên welatê xwe kiribû ku hevkarî û piştevaniya zêdetir bide kuran. Trump gotibû: “Em deyndarê kurd in, ji ber ku li şûna me û hemû cîhana azad şerê terorê dike.”
