Nêçîrvan Barzanî li ser destpêkirina bangeşeya hilbijartinên Parlamentoya Kurdistanê peyamek belav kir.
Nêçîrvan Barzanî di peyama xwe de bangî aliyan kir ku li gorî yasa û rêkarên komîsyonê tev bigerin.
Nêçîrvan Barzanî di berdewamiya peyama xwe de amaje bi wê yekê kir ku hemû alî bi hev re xwediyê destkeft û pêşketinên Herêma Kurdistanê ne.
Peyama Nêçîrvan Barzanî wisa ye:
"Kurdistaniyên hêja!
Partiyên siyasî, lîst û berbijêrên rêzdar!
Ev dema we xweş be…
Kampanyaya şeşemîn gera hilbijartinên Parlamentoya Kurdistanê sibe dest pê dike. Ez ji hemû aliyan dixwazim ku hûn li gorî yasa û rêkarên Komîsyona Bilind a Serbixwe ya Hilbijartinan tevbigerin.
Kampanyayeke aram û şaristanî bi rê ve bibin û bernameyeke hilbijartinan ku cihê bawerî û hêviyên xelkê Herêma Kurdistanê be pêşkêş bikin.
Bila kampanyayek be ku aloziyê di navbera aliyan de dernexe û civakê parçe neke. Divê wêneyekî ciwan yê Herêma Kurdistanê nîşan bide û çanda dewlemend a bihevrejiyan, hevpejirandin û cihêrengiya civaka Kurdistanê û pêkhateyên wê nîşan bide.
Armancên xelkê Herêma Kurdistanê mezin in û zemîneke berfireh ji bo hevrikiyeke şaristanî di navbera lîste û berbijêran de heye.
Her kes azad e ku propagandaya siyaset û bernameyên xwe bike û rexneyan bike lê bila ti kes û alî rê nede xwe ku kîn û nefretê belav bike.
Li vir, bi taybetî, ez dixwazim balê bikişînim ser pêwîstiya parastina rûmet û statûya jinê. Parastina jinan bi giştî û namzediya wan a ji bo hilbijartinên parlamentoyê ji bo Herêma Kurdistanê pîvaneke girîng e.
Aliyên siyasî û berbijêr ne dijminên hev in lê rikaberên siyasî ne. Ew hemû di Kurdistanîbûnê de hevpar in û çarenivîsa me hemûyan jî bi hev re ye. Lewra erka me hemûyan e ku em bi hev re hewl bidin pêvajoyeke demokratîk bi awayekî aştyane bimeşînin.
Piştî hilbijartinan divê alî û kesên serkeftî careke din bi hev re rûnin û hikûmetê pêk bînin û yên ku dibin mixalefet jî divê di warê yasadanîn û çavdêriyê de bi hikûmet û saziyên Herêma Kurdistanê re tev bigerin.
Pêkvejiyana aştiyane ya hemû ol û neteweyan rûyekî geş û bingeheke bihêz ya serkeftina Herêma Kurdistanê ye. Em hemû bi hev re xwediyê hemû destkeft û pêşketinên Kurdistanê ne. Parastina vê pêkvejiyanê erka me hemûyan e.
Ji ber vê yekê jî divê di kampanyaya hilbijartinê de rêz li pîrozî û sembolên Kurdistanê û hemû pêkhateyên wê were girtin. Em piştgiriya îradeya azad a hemû pêkhateyên Herêma Kurdistanê dikin. Divê dezgehên ewlehiyê bi awayekî aştiyane û bi rêkûpêkî bangeşeya hilbijartinê bi rê ve bibin.
Kurdistaniyên hêja!
Em li Serokayetiya Herêma Kurdistanê ji bo nehiştina nakokiyên li ser hilbijartinan demeke dirêj e digel aliyên siyasî di nava gotûbêjan de bûn.
Em tu carî ne bi paşxistina hilbijartinan re bûn lê ji bo berjewendiyên bilind ên Herêma Kurdistanê û ji bo wê yekê ku hilbijartin bi beşdariya hemû aliyên siyasî û pêkhateyan bêne kirin, me çend caran hilbijartin bipaş xistin.
Ez spasiya Hikûmeta Federal, birêz Serokwezîr Sûdanî û Serokê Desthilata Dadwerî ya Îraqê birêz Fayiq Zêdan dikim ku ji bo jiholêrakirina hemû pirsgirêkên li pêşiya rêkxistin û amadekariyên hilbijartinan, bi tevahî alîkar bûn.
Em spasiya Komisyona Serbixwe ya Hilbijartinan, dostên me yên di civaka navneteweyî de, nûnerên Neteweyên Yekbûyî û welatan ên li Îraq û Herêma Kurdistanê ji bo hevkarî û dilgermiya wan ji bo lidarxistina hilbijartinan dikin.
Welatiyên hêja!
Giranî û xurtbûna statûya Herêma Kurdistanê û nûkirina rewatiya saziyên me girêdayî lidarxistin û serkeftina hilbijartineke paqij û azad e. Lewre çavê hevalên me li her derê li ser vê hilbijartinê ye û erka me hemûyan e ku em ji bo serkeftina wê kar bikin.
Hilbijartina parlamentoyeke bihêz alîkar û derfeteke girîng e ji bo bihêzkirina sîstema demokrasî, sazî û reforman û her wiha ji bo parastina Herêma Kurdistanê û bicihanîna sîstema federalî û misogerkirina mafên destûrî yên gelê Kurdistanê.
Bi hêviya kampanyayeke aram û hilbijartineke serkeftî.
Demeke xweş ji we hemûyan re dixwazim."
