Nêçîrvan Barzanî û şandeke Amerîkî tekezî li ser çareserkirina kêşeyên Hewlêr û Bexdayê li gor destûrê dikin

Serokatiya Herêma Kurdistanê di daxuyaniyekê de ragihand, Serokê Herêma Kurdistanê Nêçîrvan Barzanî îro 15.01.2025an li Hewlêrê, pêşwazî li Cîgira Alîkarê Wezîrê Derve yê Amerîkayê yê karûbarên Rojhilata Navîn Victoria Taylor û şanda pê re kir.

Di civînê de peywendiyên Amerîkayê bi Iraq û Herêma Kurdistanê re, peywendiyên Hewlêr û Bexdayê, hewlên pêkanîna kabîneya nû ya Hikûmeta Herêma Kurdistanê, rewşa siyasî ya Iraqê û pêşhatên dawî yên navçeyê hatin gotûbêjkirin û herwesa di hevdîtinê da, li ser guhertin û pêşketinên li Sûriyê danustandina bîr û ramanan kirin.”

Her du alî li ser girîngiya çareserkirina pirsgirêkên di navbera Hewlêr û Bexdayê da li gor destûr, yasa û rêkeftinan hemfikir bûn û tekez li ser parastina aramî û seqamgîriya navçeyê û nebeşdarbûna Iraqê di alozî û pevçûnên Rojhilata Navîn de kirin.