Tevgera Sedr du proje pêşkêşî Barzanî kirin

Serokatiya Herêma Kurdistanê bi daxuyaniyekê diyar kir ku di hevdîtinê de li ser rewşa siyasî ya Iraqê û şerê li dijî DAIŞê ya li Mûsilê hatiye axaftin.

Herwiha di hevdîtinê de Tevgera Sedir li ser pêvajoya siyasî ya Iraqê, qonaxa piştî DAIŞê û hilbijartinên pêşeroja Iraqê de nêrînên xwe aşkere kirine.

Ji aliyê ve Tevgera Sedir jî eşkere kir ku du projeyên serokê Tevgera Sedir Muqteda Sedir, ji aliyê Ehmed Sedir ve radestî Serokê Herêma Kurdistanê Mesûd Barzanî hatiye kirin û her du proje li ser hilbijartina Iraqê û qonaxa piştî DAIŞê ne.

Ji wan projeyan yek ew e ku, bi rêya komîsyoneke nû ya serbixwe, hilbijartineke azad û pak û herwiha hilbijartineke dadperwerî were pêkanîn.

Projeya duyem jî ew e ku piştî DAIŞê ji bo Mûsilê sindoqeke navdewletî ya alîkariyê were pêkanîn, da ku Mûsil ji nû ve were avakirin û xelkê awarebûyî vegerin cih û warên xwe.