Ajansa Kurdistan24ê li Bexdayê ragehand, kêmekê berî niha kombûna Şanda Hikûmeta Herêma Kurdistanê û Wezîrê Darayî yê Hikûmeta Federal bi Lijneya Darayî ya Civata Nûnerên Îraqê re dest pê kir. Di wê kombûnê de, Wezîrê Darayî û Aborî yê Hikûmeta Herêma Kurdistanê dê hûrkariyan li ser dahat û xerciyan berçav bike.
Doh roja Sêşemê, 17ê Cotmeha 2023ê, şandeke Hikûmeta Herêma Kurdistanê ku ji Wezîrê Darayî û Aborî Awat Cenab Nûrî, Serokê Dîwana Civata Wezîran Umêd Sebah, Sikirtêrê Civata Wezîran Amanc Rehîm, Serokê Hemahengiya Lidûçûnê Ebdulhekîm Xesrew û hejmareke şêwirmend û rêveberên giştî yên Wezareta Darayî û Wezareta Samanên Xwezayî pêk tê, serdana Bexdayê kir.
Endama Lijneya Darayî li Civata Nûnerên Îraqê Nermîn Merûf ji K24ê re ragehand: “Şanda Hikûmeta Herêma Kurdistanê tê Lijneya Darayî, ji bo ku bersiva wan pirsyaran bide yên ku ji aliyê lijneyê ve arasteyî Wezareta Darayî û Aborî ya Hikûmeta Herêma Kurdistanê hatine kirin, li ser mijarên bendên 12 û 13 ji qanûna bodceyê, her titşekî girêdayî dahatên neneftî û dergehên sinorî û wê nefta ku radestî Kompaniya Somoyê tê kirin, herwesa mîlakatên Hikûmeta Herêma Kurdistanê ji medenî, serbazî, xanenişînan û çavdêriya civakî, pereyê ku mehane ji bo mûçeyên wan pêwîst e. Lijneya Darayî ew pirsyar hemî bi nivîsarekê arasteyî Nûnerên Hikûmeta Herêma Kurdistanê kirine”.
