HDP: Divê Parlamentoya Tirkiyê Helebce wek 'Qirkirina Netewî' binase

Parlamenterê HDP yê Wanê Lezgîn Botan, bi pêşnûmeyek yasayî arasteyê Parlamentoya Tirkiyê kir û xwest, jenosayda Helebce ya sala 1988'ê ji hêla Tirkiyê ve jî wek "Jenosaydê" bê naskirin.

Lezgîn da xuyakirin, di bombebarana kîmyayî ya rejîma Beis de ji 5 hezarê zêdetir Kurd hatine kuştin û 10 hezarê zêdetir jî birîndar bûne û da zanîn, Dadgeha Bilind ya Iraqê sala 2010'ê ev kiryar wek "Jenosayd" binav kiriye û Parlamentoyên Iraq û Kurdistanê jî wek jenosayd nas kirine.

Herwiha Parlamentoyên Brîtanya, Swêd û Norveçê jî kiryarên "Enfalê" wek "qirkirina kurdan" nas dikin.

Da xuyakirin, Kurdên ku li Helebce hatine qirkirin birayên rasteqîn yên Kurdên Bakurê Kurdistanê ne û da zanîn, naskirineke wiha dê pêwendiyên Tirk û Kurdan geş bike.