Li navçeya Ladikê ya ser bi parêzgeha Samsunê ya Tirkiyê, ji ber barana zêde ava çeman bi ser de çûye û malên welatiyan di bin avê de mane.
Welatiyekî 65 salî dema xwestiye ajelên xwe di ser pirê re derbas bike ketiye nav avê û canê xwe ji dest daye.
Li navçeya Inebolê ya parêzgeha Kastamonuyê jî navenda navçeyê bûye çemekî mezin û tîmên peywendîdar hewl didin bi makîneyên kar pêşiya avê paqij bikin.
Li navçeya Gumuşhacikoyê ya ser bi parêzgeha Amasyayê jî heman rewş heye ku hejmarek mal û axûrên welatiyan di bin avê de mane. Welatî dibêjin, ti salan bi vî awayî baran nebariyaye.
Welatiyek dibêje: “Berê jî baran dibarî lê biqasî ya îsal nebû. Av ji pişta mala me hat û me nikarîbû asteng bikin. Gelekî zêde bariya. 50 sal in min baraneke wiha nedîtibû. Her der tarî bû û ji nişkave bariya.”
Li navçeya Ayancikê ya ser bi parêzgeha Sînopê jî ji ber lehiyê rêya sereke hilweşiya û çemekî mezin li nav bajêr çêbû.
Ji ber rewşa heyî li navçeyeke parêzgeha Samsunê û li 2 navçeyên Sînopê jî bo dema rojekê dibistan hatin girtin.
Saniya Altun, muxtarê gund dibêje: “Ji nişka ve baran barî û av bi ser malên me de hat. Lehiyê her tişt li ber xwe bir. Îsal ev 3-4 car in heman tişt dibe. Jêrxana navçeyê nema, hemû tişt xirabû.”
Li navçeya Zarûşad a Qersa Bakurê Kurdistanê jî ligel baranê teyrok bariya û zeviyên çandiniyê di bin avê de man.
Li seranserê Tirkiyê û Bakurê Kurdistanê barîna baranê berdewam e û li gor Saziya Keşnasiyê ya Tirkiyê dê bo dema hefteyekê berdewam be. Herwiha hişyariya lehiyê hatiye dayîn û hatiye xwestin ku tedbîrên pêwîst bên wergirtin.
