Amanca vê konferansê ew bû ku saziyên beşdar banga aştiyê li PKK û Hikûmeta Tirkiyeyê bike. Wisa jî bû.
Di encama nîqaş û dabaşê de bi îmzekirina 200 nûnerên saziyên sivîl ên Amedê û bajarên din ên Kurdan encamnameyek hate amadekirin.
Encamname bi daxuyaniyeke çapemeniyê ji raya giştî re hate eşkerekirin. Banga bêdengkirina çekan li her du aliyan hate kirin.
“Divê çek bên bêdengkirin”
Seroka Odeya Bijîşkan a Amedê Elîf Turanê got, “Ji bo çareserkirina pirsa Kurd careke din bi pêvajoyeke nû ya aştiyê heye.
Ji bo vê yekê jî divê çek bêne bêdengkirin. Ji bo aştiyeke mayînde û civakî, ji bo ku hemû aktor bikaribin rola xwe pêk bînin, divê astengiyên li pêşiya wan bêne rakirin û derfetên pêwîst ji bo wan bêne dabînkirin.”
Endamên platformê xwest hikûmet jî û PKK jî bersiveke erênî bide bangewaziya wan û rêya çareseriyeke aştiyane vekin.
“Divê hem operasyon hem jî êrişên PKKyê bên sekinandin”
Serokê Baroya Amedê Nahît Eren wiha anî ziman, “Dema ku mirov ji bo aştî û çareseriyê dest bi xebatê dike, bi rastî divê jixwe çek neteqin.
Em dibêjin hem operasyon û hem jî êrişên PKKyê di vê pêvajoyê de gerek bêne sekinandin dema ku helbet pêvajoyeke wiha dest pê bike.”
Guleya yekemîn a PKKyê di 15ê Tebaxa 1984an de ji aliyê Mehsûn Korkmaz bi navsnavê Egîd ve hatibû teqandin.
Lê îro endamê platformeke sivîl ku navê wî jî Mehsûn Korkmaz e, dixwaze teqandina guleyan bê rawestandin û her du alî jî rêyên aştiyane bidin ber xwe.
“Divê astengiyên li pêşiya aktorên pêvajoya aştiyê rabin”
Serokê Odeya Endezyarên Avahiyan a Amedê Mehsûn Korkmaz wiha axivî:
Divê astengiyên li pêşiya aktorên vê pêvajoyê rabin û ew bikaribin erka xwe bi cih bînin.
Ya duyemîn jî divê astengiyên li pêşiya zimanê Kurdî û çanda Kurdî hatine danîn hemû bêne rakirin.”
Ji sala 2015an ve cara yekem
Ji sala 2015an ve cara yekemîn e ku saziyên sivîl ên Amedê û bajarên din ên Kurdan ji bo çareserkirina pirsgirêka Kurd bi rêyên aştiyane civîneke evqas berfireh li dar dixin û banga aştiyê li her du aliyan dikin.
