Heftemîn rûniştina doza parêzerê Kurd û serokê berê yê Baroya Amedê Tahir Elçî ku sala 2015an di êrîşeke çekdarî de hatibû kuştin, sibe 5ê Temûzê demjimêr 10:00 li 10emîn Dadgeha Cezayên Giran a Amedê birêve diçe.
Heftemîn rûniştina Doza Tahir Elçî sibe 5ê Temûza 2023an tê kirin.
Di çarçoveya dozê de 4 kes tên darizandin ku 3 jê polîs in. Tevî ku di ser kuştina wî re 8 sal derbas bûne lê heta niha ji Doza Tahir Elçî biryarek derneketiye.
Di dozê de kesê bi navê Ugur Yakişir ku nehatiye girtin bi daxwaza cezaya heta hetayê û polîsên bi navê S.T., F.T. û M.S. jî bi daxwaza cezaya 2 sal û 6 mehan tên darizandin.
Serokê Baroya Amedê Tahir Elçî 28ê Mijdara 2015an dema ku ji bo şermezarkirina hilweşandina Minareya Çar Ling a dîrokî ya li navçeya Sûrê daxuyanî dida medyayê di êrişeke çekdarî de gule li serê wî ketibû û di encam de canê xwe ji dest dabû.
Doza Tahir Elçî piştî kuştina wî bi 5 salan hatibû vekirin û yekemîn rûniştina dozê di 21ê Cotmeha 2020an de hatibû lidarxistin. Şeşemîn rûniştina dozê jî di 23ê Mijdara 2022an de hatibû kirin.
