Li Erzeromê 4 kes bi hinceta PKKê hatin desteserkirin

Li gor daxuyaniya Rêveberiya Emnî ya Erzeromê di kordîneya Serdozgeriya Komarê ya heman parêzgehê de tîmên Şaxa Rûbirûbûna Terorê operasyon pêk anîne. Herwiha di encama operasyoneke hevdem de bi hinceta “alîkarî û propagandeya rêxistinê” 4 kes hatine desteserkirin.

Heman rojê li parêzgeha Colemêrgê ya Bakurê Kurdistanê jî ku di hilbijartinên 14ê Gulanê de Partiya Çepên Kesk karî hersê kursiyên parêzgehê misoger bike û 3 parlamenter derxistin, polîsan bi ser gelek malan de girtin û li gor agahiyên hatine belavkirin herî kêm 30 kes bi tohemtên “propagandeya rêxistinê” û endambûna rêxistinê” hatine desteserkirin. Li parêzgeha Dîlokê jî bi heman hincetê 5 kes hatibûn desteserkirin.

Li Tirkiyê û Bakurê Kurdistanê, hêzên emnî rojane bi ser malan de digrin û bi “hinceta PKKê” xelkê sivîl û siyasetmedarên Kurd desteser dikin.