Li Meletiyê erdhejek din çêbû; 29 avahî hilweşiyane, 1 mirî û 69 birîndar hene

Serokatiya Rêveberiya Karesat û Rewşên Bilez (AFAD) ragihand ku îro Duşemê 27ê Sibatê demjimêr 12:04 deqe bi hêza 5.6 pile erdhejek li parêzgeha Meletiyê çê bûye.

AFADê ragihandiye, navenda erdhejê li navçeya navendê ya Çirmikê (Yeşilyurt) û di kûrahiya 6.96 kîlometreyî de çêbûye.

Resedxaneya Kandili ya Tirkiyê jî ragihandiye, erdhej li navçeya Çirmik a Meletiyê bi hêza 5.5 rîxterê û di kûrahiya 5 kîlometriyê de çêbûye.

AFADê derbarê zirarên erdheja îro ya Meletiyê de daxuyanî daye û ragihandiye, 29 avahî herifîne.

Serokê AFADê Yunus Sezer ragihandiye, di encama erdheja îro de li gor agahiyên destpêkê kesekî jiyana xwe ji dest daye û 69 kes jî birîndar bûne.

Bi gotina Sezer, hewldanên lêgerîn û rizgarkirinê li 5 avahiyan berdewam in.

Îro di demjimêrên berê sibehê de li navçeya Serêgolê ya parêzgeha Semsûrê û li navçeya Cela ya parêzgeha Mereşê yên Bakurê Kurdistanê jî bi hêza 4 û 5 pile du erdhejên din çê bûbûn.

Piştî erdheja 6ê Sibatê zêdeyî 10 hezar erdhejên paşekî çêbûne ku ya herî mezin bi hêza 6.4 pile li Hatayê bû.