Di demjimêrên şeva 16ê Hezîrana 2022ê Hêzên Ewlekariya Tirkiye bi biryara Serdozgeriya Komarê ya Amedê bi operasyoneke hemwext avêtibûn ser mala Rêxistina Amedê yê MHPê û Serokê rêxistina wê partiyê Cîhan Kayaalp jî di nav de hejmareke berpirs û rêvebirên wê partiyê bi hinceta "gendelî" û "fesadiya îhaleyê" destserkiribûn.
Li gor zanyariyên di medyaya Tirkiye de belavbûne do 17ê Hezîrana 2022ê piştî temambûna karûbarên îfadeyê yên li navenda ewlekariyê Cîhan Kayaalp bo dadgehê hatiye şandin û piştî dadgehkirinê bi tohmeta "destdirêjiya zarokkekê" hatiye girtin.
Komîsyona Zarokan a Baroya Amedê derbarê girtina serokê rêxistina MHPê yê Amedê de li ser hesabê xwe yê medyaya civakî peyamek belavkiriye û dibêje: “Em bo raya giştî radigihînin ku di wê dosyeya ku Cîhan Kayaalp bi tohmeta destdirêjiya zaroka hatiye girtin de, em piştevaniya hiquqî didin wê zaroka ku rûbirûyî destdirêjiyê bûye û em dê dosyeyê ji nêzîk ve bişopînin.”
Ev di demekê de ye Partiya Tevgera Neteweperest (MHP)ê roja Pêncşemê 16ê Hezîrana 2022ê avahiya rêxistina xwe ya li parêzgeha Amedê bi temamî girtibû û dawî li çalakiyên xwe yên siyasî yên li wê parêzgehê anîbû.
