Zeviyên nêzîkî 25 gundên kurdên ser bi qeza Xaneqînê ji aliyê erebên hawirde yên dema Rejîma Beis di çarçoveya siyaseta ereb kirinê de hatibûn dagirkirin, naha jî ew erebên hawirde yên wê demê careke din dixwazin vegerin ser wan erd û zeviyên wan gundan.
Vê derbarê de berpirsê komîteya Xaneqînê yê Partiya Komînîst (Şûî) Ebas Rehman îro 14.06.2022yê ji BasNewsê re ragehand, careke din erebên hawirde têne sînorê Xaneqînê û parêzer jî girtine ji bo ku peymana zeviyên çandiniyê yên dema Rejîma Beis ji bo wan nû bikin.
Herwaha got, erebên hawirde dest bi tomar kirina dozê kirine li dadgehên Xaneqînê û dadgeh jî wan dozên wan qebûl dike û dixwazin vegerin ser zeviyên çandiniyê yên gundên derdora Xaneqînê. Lê di rastiyê de ew mafê wan tine.
Li gor zanyariyên BasNewsê, bê ku dadgeh wê peymana çandiniyê ji bo erebên hawirde nû bike, ew erebên hawirde çûne gundên Xwe û Husên Meme û ji cotkarên wan gundan re gotine, demekî din dê wegerin ser wan gundan, ji ber ku berê ji wan re hatibû dayîn. Lê ew herdu gund û 25 gundên din jî yên ku ew erebên hawirde dixwazin bên mulkê kurdan in.
