Qayimqamê Çemçemalê ragehand, “Berî demeke kêm bi dronan êrîşî ser Zeviya Kormorê ya Gazê li Çemçemalê hat kirin.” Herwesa dibêje, “Çi zirarên canî nebûn.”
Qayimqamê Çemçemalê Remik Remezan duh (Yekşem, 02.02.2025) taybet ragehand, “Nêzî seet 07:10 ê êvara îro êrîşî ser Zeviya Kormorê ya Gazê li Çemçemalê hat kirin.”
Remik Remezan amaje jî da, “Nayê zanîn ka ew êrîş bi dronê an jî bi katyoşayê hatiye kirin.” Herwesa got, “Zirarên canî nebûne û qebareya zirarên madî jî heta niha nehatiye zanîn.”
Li roja 26ê Nîsana par jî bi dronê êrîşî ser Zeviya Kormorê ya Gazê li sinorê Çemçemalê hatibû kirin. Di encama wê êrîşê de, çar karkerên Yemenî hatibûn kuştin û duyên din jî birîndar bûbûn. Her ji ber wê sedemê, 2500 mêgawatên karebê kêm bûn.
Zeviya Kormorê ya Gazê dikeve sinorê nahyeya Qadir Keremê ya parêzgeha Silêmaniyê, ku ji sala 2003ê ve di bin kontirola Hikûmeta Herêma Kurdistanê de ye. Ji sala 2008ê ve dest bi berhemanîna gazê li wê zeviyê hatiye kirin, berhemê wê yê ronaje 450 milyon pêyên sêcarkî ne û biryar e heta dawiya îsal ji bo 500 milyon pêyên sêcarkî bilind bibe.
Zeviya Kormorê ya Gazê dabînkera 67% ya kareba Herêma Kurdistanê ye, yanî sê hezar û 700 mêgawatên karebê berhem tîne. Berhemê gaza wê bi rêya boriyan ji bo westgehên karebê yên Hewlêr û Çemçemalê tê veguhastin. Gaza xwezayî ya zêde ku li Kormorê heye bi yek tirilyon û 800 milyar pêyên sêcarkî tê xeminandin.
