France Press: Barzanî ji berê bihêztir bûye

Ajansê di rapora xwe de diyar kiriye, ku serkirdeyê pêşeng ê Kurd, Mesûd Barzanî û Partiya Demokrat a Kurdistanê, niha hêza destbilind û bê rikaber in li Herêma Kurdistanê, hevdem li gel vê yekê di meydana siyaseta federalî de li Bexdayê, aliyekî siyasî bihêz in û gellek destkeft bidest ve anîne.

Di wê raporê de hatiye: Tevî ku Partiya Demokrat a Kurdistanê di rikberiya bidestxistina postê Serokatiya Iraqê de biser neket, lê hevsengiya hêzê di pêşbirka bidestxistina postên wezarî yên xurt, li cem Partiya Barzanî ye.

Herwiha rapor behsa wê yekê jî dike, di piroseya hilbijartinên Perlemana Iraqê de, Partiya Demokrat a Kurdistanê, bi bidestxistina 25 kursiyan, bûye mezintirîn partî di Iraqê de. Ji ber ku tevahiya hêzên Iraqî bi riya hevpeymanan beşdarî hilbijartinan bûn û PDK bi tena xwe beşdarî kir û bilindbûna hejmara kursiyên PDK di Perlemana Iraqê de, eşkere kir, ku PDK li ser astê Iraqê jî yekem e û partiya herî mezin e.