Şandeke Amerîkî li Rojava bi Rêveberiya Xweser re civiya

Cîgirê Alîkarê Wezîrê Derve yê Amerîka Ethan Goldrich serdana Rojavayê Kurdistanê kir, piştevaniya aramiya navçeyê, rewşa kampan û proseya vegerandina biyaniyan ji kampan û şerê terorê bi berpirsên Rêveberiya Xweser re gotûbêj kir.

Berpirsê Amerîkî ligel hevserokê Desteya Peywendiyên Derve Bedran Çiya Kurd û çend berpirsên din yê rêveberiyê re hevdîtin pêk anî.

Bedran Çiya Kurd ji berpirsê Amerîkî xwestiye ku civaka Navdewletî di şerê li dijî terorê de di warê alîkariyên mirovî û siyasî û aborî de piştevaniya wan bike û planên dem dirêj ji bo kampa Hol û kampên din û malbatên DAIŞê amade bike.

Alîkarê Cêgirê Wezîrê Derve yê Amerîka jî got, wê hevkariya wan bi Hêzên Sûriye Demokratîk (HSD), Encûmena Sûriya Demokratîk (MSD) û Rêveberiya Xweser re ji bo jinavbirina DAIŞê berdewam bibe.

Ethan Goldrich got, ew aramiya navçeyê gotûbêj dikin û giring e ku aramî û asayişa navçeyê bê parastin û Amerîka piştevaniya vê yekê dike.