HezKurd dixwaze qada kampanyaya zimanê Kurdî berfireh bike

Piştî vê daxwaza, Rêveberiya HezKurdê xwe amade dike ku, li bajarên Bakurê Kurdistanê yên din jî dem bi dem vê kampanyayê bidomîne. Bi vê mebestê, HezKurdê bi pêşengiya berpirsê kar û barên dîplomatîk Fethûllah Elçî û bi rêveberiya HezKurdê ya li Şirnexê, heman çalakî pêk anî. Rêveberê HezKurdê Fethûllah Elçî dibêje ku: "me hezar heb Alfabeya Kurdî, kartên rengan û hejmarên bi Kurdî û belavokek li ser hişmendiya zimên, li kolanên Şirnexê di nava dikandaran, bazirganan, zarok û kesên medenî da belavkirin. Di dema belavkirinê da, em pir şanazbûn ku miletê me bi rastî jî bi awayekî pir germ û dilşad em pêşwazî kirin. Û me dît ku, hezar kart kêm in, divê bi deh hezaran belav binin. Ji ber ku, yên ku me belav kirin, têr nekir û gelek kes destvala ma."

Elçî wiha qedand:" lê belê em soz didin ku, di demên pêş da emê vî karê xwe berdewam bikin û bi vî awayî hişmendî û hezkirina zimên bidin hezaran însanan û taybetî jî zarokên Kurd. Li gorî me, ku ziman nebe neteweyek jî nabe. Emê ti car nehêlin Zimanê Kurdî têk biçe."

Gorî zanyarîyên ku HezKurd dide, di rojên pêş da, çalakiyên wan yên sivîl û li qadan dê bidomin. HezKurd piştî ku li Amedê derket li qadan û di nava gel da karê pratîkî pêk anîbû, li ser medyaya civakî rastî eleqeyeke baş hatibû û bi hezaran însan karê wan ecibandibû.