Civîn di cîhê Komeleyê de hate çêkirin.
Berîya hefteyekê jî li ser malpera Facebookê ya Komeleyê (Mazî Derik) agahdarîya vê civînê hatibû belav kirin.
Komeleya Dêrikîyan a Li Stenbolê , dixwaze karsaz, akademîsyen, burokrat, sîyasetmedar, nivîskar, rewşenbîr, hunermend, alimên olî, aktîvîstên dezgehên sivîl, kesayetên ku di beşên cuda cuda yên jîyanê de derketine pêş, yên Dêrikî, bi Dêrikîyan bidin nasîn û dîyalogekê di navbeyna wan û Dêrikîyan de bihûne. Komele, wek xebateke nû, van civînan dê li dar bixe. Di van civînan de kesayetên Dêrikî yên di beşên cuda cuda yên jîyanê de derketine pêş, dê bi Dêrikîyên li Stenbolê re bikaribin sohbetê bikin û van kesayet dê behsa kar, aktîvîte, fikir, berhem û jîyana xwe bikin.
Mêvanê ewil ê van civînên sohbet û danasînê, nivîskar û rewşenbîrê Kurd ê Dêrikî kek Enwer Karahan bû.
Ez bi xwe jî endamê Komeleya Dêrikîyan a li Stenbolê me. Lê îro, wek Serokê Giştî yê PAK, ez jî mêvanê duyem ê vê xebata nû ya komeleyê bûm.
Civîn îro(26.12.2021) hate li dar xistin.
Cîhgirên Serokê Giştî yê PAKê Kasim Ergun û Mehmet Gul, endamên Meclîsa PAKê Mehmet Dortyama û Seyîd Bayram, Serokê DGDyê(Dogu ve Guneydugu Dernekler Platformu) Abdulhakim Daş û rêvebirên DGDyê jî beşdarî civinê bûn.
Dêrikîyên me yên li Stenbolê jî eleqeyeke baş nîşanî civînê dan.
Moderatorîya civînê kek Enwer Karahan birêvebir.
Min di civînê de, behsa kurte jîyana xwe, girîngîya komeleyên mehelî û rola Komeleyên Dêrikîyan ên li bajarên cuda cuda kir. Min behsa partîya me PAKê(Partîya Azadîya Kurdistanê)kir. Min di derbarê bîr û bawerî, sîyaset û bernameya PAKê de, di derbarê doza girtinê ya di heqê PAKê de aghdarî dan. Beşdarên civînê jî pirsên xwe kirin. Heta ku ji destê min hat, min jî bersîva pirsan da. Civîn di atmosfereke samîmî, dostane û berhemdar de derbas bû.
Di dawîya civînê de Serokê Komeleya Çandî û Piştgirîyê ya Dêrikîyan ya li Stenbolê kek Sedat Gungorur li ser navê komeleyê Plaketek da min.
Bi hêvîya ku Komeleya Dêrikîyan a Li Stenbolê van civînan berdewam bike, da ku kesayetên Dêrikî yên di beşên cuda cuda yên jîyanê de derketine pêş bikaribin bi Dêrikîyên li Stenbolê sohbetan bikin.
Herweha ez hêvî dikim ev gava ku Komeleya Dêrikîyan a Li Stenbolê avêtîye, ji hemû komeleyên Dêrikîyan û ji hemû komeleyên mehelî re jî bibe wek nimûne da ku di vê mijarê de kultureke nû destpê bibe.
Ez careke din ji ber amade kirina vê civînê, ji ber vê keda wan a hêja û ji ber wê plaketa ku ji bo min xwedîyê nirxeke pir mezine dane min; ez spasîya Serokê Komeleya Çandî û Piştgirîyê ya Dêrikîyan ya li Stenbolê Kek Sedat Gungorur û spasîya hemû endamên Rêveberîya Komeleyê dikim. Li gel tedbîrên Covîd19ê jî , ez ji bo beşdarîya wan spasîya hemû hemşerîyên me yên Dêrikî dikim.
Ji bo moderatorîya wî spasîya kek Enwer Karahan dikim.
Spasîya Cîhgirên Serokê Giştî yê PAKê kek Kasim Ergun û kek Mehmet Gul, endamên Meclîsa PAKê kek Mehmet Dortyama û kek Seyîd Bayram, Serokê DGDyê(Dogu ve Guneydogu Dernekler Platformu) kek Abdulhakim Daş û rêvebirên DGDyê û hemû kesayetên ku beşdar bûne dikim.
26.12.2021
Mustafa Ozçelîk
Serokê Giştî yê PAKê
