Biden gefa êrîşên zêdetir dixwe
Serokê Amerîkayê nameyek ji Serokê Encûmena Nûneran re şand û tê de got ku êrîşa 23ê Tebaxê ya li Bakurê Sûriyê li ser daxwaza wî wek fermandarê giştî yê hêzên çekdar ên Amerîkayê bû û cihê komên milîs ên nêzîkî Supaya Pasdarên Şoreşa Îslamî ya Îranê ye kir armanc.
Serokê Amerîkayê Joe Biden duh 25ê Tebaxa 2022an de nameyek ji Seroka Encûmena Nûneran Nancy Pelosi re şand û got, “Bi fermana min, di 23ê Tebaxa 2022an de, Hêzên Amerîkayê hejmarek êrîşên teqez li ser xaleke li bakurê Sûriyê pêk anîn. Ew pêgeh ji aliyê grûpên milîs ên nêzîkî Supaya Pasdaran a Komara Îslamî ya Îranê ve dihat bikaranîn; van grûpan di çend êrîşên dron, mûşek û hawanê de li ser karmendên (serbaz, şêwirmendên leşkerî, peymankar) û çeperên Amerîkayê yên li Sûriyê kirine, ji wan du êrîş li ser du Baregehên Amerîkyê yên li Tenef a Sûriyê, di 15ê Tebaxa 2022an de hat encamdan. Piştî rêze êrîşên komên milîs ên bi piştevaniya Îranê li Iraq û Sûriyê di şeş mehên borî de, li dijî bingeh û hêzên me li Sûriyê hatin kirin jiyana personelên Amerîkayê û Hevpeymanan xiste metirsiyê.”
Serokê Amerîkayê Joe Biden hişyarî da ku Amerîka amade ye gavên zêdetir bavêje ji bo bersivdana her gef û êrîşeke din.
Pentagonê jî gotibû ku wan 24ê vê Tebaxê, wek tolhildana êrîşa 15ê mehê, 9 pêgehên çekdarî yên grûpên nêzîkî Îranê armac kirine.
Amerîka dibêje, destpêkê biryar bû 11 pêgeh armanc bikin lê ji ber hebûna sivîlan êrîşa li ser 2 pêgehan hilweşandin.
Pentagonê gotibû ku wan perçayên dronan li Sûrîyê dîtine ku mora Îranê li ser diyar e û ev nîşana wê yekê ye dibe ku Îran êrîşên bi vî awayî zêdetir bike lê Pentagon hişyariyê dide ku êrîşên Îranê yên li dijî berjewendiyên wan wê bêbersiv nemînin.
