Îsraîl: Êrişên me dê berdewam bikin
Sererkanê Artêşa Îsraîlê Eyal Zamir li Tel Evîvê bi berpirsên payebilind ên artêşa welatê xwe û hêza asmanî ya Îsraîlê re civiya.
Eyal Zamir piştî civîna bi berpirsên artêşê re got, ”Me rêya asmanî ya gihîştina Tehranê vekiriye û em bi hurgilî jêrxan û bingehên nukleer ên rejîmê bombebaran dikin.
Bi operasyonên xwe em tehdîdên li ser xwe bi dawî dikin û ewlehiya welatê xwe jî xurt dikin.”
Di heman demê de Wezîrê Parastinê yê Îsraîlê Itamar Ben-Gvir jî eşkere kir ku êrişên artêşa Îsraîlê yên li dijî bernameya nukleer a Îranê dê bidomin.
Ben-Gvir ji ser hesabê xwe yê Xê got, "Bi îzna Xwedê dewleta Îsraîlê dê bi ser bikeve.
Divabû Îsraîlê êrişî bernameya nukleer a Îranê bikira û Îsraîl dê êrişên xwe yên dijî bernameya nukleer a Îranê bidomîne."
Roja înê Îsraîlê êrişî Îranê kir û pişt re Îranê jî bersiv da.
Li gorî amarên fermî, li Îranê bi sedema êrişan 128 kes hatine kuştin û li Îsraîlê jî 13 kes mirine.
Li gorî berpirsên Îsraîlê, ew dixwazin kapasîteyên nukleerî û mûşekî yên Tehranê tune bikin.
Berpirsên Îranê jî dibêjin, heya ku Îsraîl êrişên xwe bidomîne, ew jî dê bi tundtir bersivê didin wê.
