Kerkûkî: Bexda demografiya Kerkûkê diguhere!
Endamê Polîtburoya PDK'ê û Fermandarê Hêzên Pêşmerge Kemal Kerkûkî destnîşan kir ku Bexda hewl dide demografiya bajarê Kerkûkê biguhere.
Kemal Kerkûkî ji Rûdaw'ê re da xuyakirin, li gorî zanyariyên ku gihîştine destê wî, tenê ji heftiya bihorî ve heta niha 1413 malbatên Ereb ji naverast û başûrê Iraqê li Kerkûkê hatine bicihkirin.
Kemal Kerkûkê got: "Tevî bicihkirina ereban li Kerkûkê, zulm û zorê jî li Kurdan dikin."
Her wiha bi gotina Kerkûkî, hikûmeta Iraqê tevî hewla guhertina demografiya Kerkûkê û derxistina kurdan û bicihkirina ereban li şûna wan, erebên li deverê jî çekdar dikin û hêzên milîsî bo wan pêk tînin.
Wî fermandeyê Hêza Pêşmerge tekez kir, ku hêzên Iraqê li Kerkûkê zulm û zorê li welatiyên Kurd ên Kerkûkê dikin, bi şev diçin ser malên Kurdan û xortan digirin û li derveyî her pîwaneke mafên mirovan, wan îşkence dikin, ku çarenivîsa beşek ji wan jî nediyar e.
