Wezîrê Tendirustiyê aşkere kir: 9 kuştî û 32 birîndarên êrîşa Îranê hene

Wezîrê Tendirustiyê yê Herêma Kurdistanê aşkere kir, di êrîşên îro yên Îranê de bo ser binke û baregehên partiyên Rojhilatê Kurdistanê de heta niha 9 kesan canê xwe ji dest dane.

Sibe îro Çarşembê 28ê Îlona 2022an Îranê hejmarek binke û baregehên partiyên Rojhilatê Kurdistanê yên di nav axa Herêma Kurdistanê de bombebaran kirin.

Li gor agahiyan, di êrîşên îro de binke û baregehên Komeleye Zehmetkêşên Kurdistana Îranê li Zirguwêz a parêzgeha Silêmaniyê, Partiya Demokrata Kurdistana Îranê (PDKÎ) li navçeya Koye ya Hewlêrê, û Partiya Azadî ya Kurdistanê (PAK) li Şêrawa ya Pirdê li ser rêya Kerkûk-Hewlêrê hatine armanckirin.

Di encama êrîşên mûşekî û bi dron ên Îranê de hejmarek kuştî û birîndar hene.

Wezîrê Tendirustiyê yê Herêma Kurdistanê, Saman Berzincî herî dawî di bultena saet 15:00an a Rûdawê TV de ragihand, di encama êrîşên Îranê de 9 kesan canê xwe ji dest dane û 32 kes jî birîndar bûne.