Li parêzgeha Duhokê Pêşmergeyek bi bombeya TNT ya PKKê birîndar bû

Li navçeya Dêrelokê ya li parêzgeha Duhokê, çekdarên PKKê bomebeyeke TNT li ser rêya hêzên Pêşmerge bicih kirin û di encamê de Pêşmergeyek birîndar bû.

Derbarê teqîna bombeya TNT de, jêderekî ji hêzên Pêşmerge ji ajansa K24ê re ragihand, wan 2 xalên kontrolê yên nû li wê deverê danîne, çekdarên PKKê bi şev hatine û TNT danîne ser rêya wan.

Got jî: Di encama teqîna bombeya TNT de Pêşmergeyek bi sivikî birîndar bû.

Ji ber şerê di navbera PKK û artêşa Tirkiyê de zêdetirî 800 gundên sînorî yên Herêma Kurdistanê vala bûne û hikûmet jî nikare destê avedaniyê bigihîne wan gundan.

Çekdarên PKKê li hinek navçeyên sînorê Herêma Kurdistanê ji bo rêgiriyê li nêzîkbûna artêşa Tirkiyê bike û wan deveran kontrol bike, bombeyên TNTê diçîne, ku gelek caran ew bombe bi gundiyan, geştyaran û hêzên Pêşmerge diteqînin û dibin qurbanî.