Serokatiya Herêma Kurdistanê dema hilbijartinên Parlamentoya Kurdistanê diyar kir

Îro Pêncşemê 3ê Tebaxa 2023an, Berdevkê Serokatiya Herêma Kurdistanê Dilşad Şehab ragihand, Serokê Herêma Kurdistanê roja 25ê Sibata 2024an wek roja encamdana hilbijartinên Parlamentoya Kurdistanê diyar kir û hemû alî raspartin ji bo encamdana rêkarên pêwîst.

Ev di demekê de ye ku roja 19ê Tîrmeha 2023an, Komîsyona Bilind a Serbixwe ya Hilbijartinan a Iraqê pêşniyar dike, roja 18ê Sibata 2024an yan rojek piştî wê rojê, hilbijartinên Parlamentoya Kurdistanê werin encamdan û tekezî li wê yekê dike ku nikarin herdu hilbijartinên encûmena parêzgehên Iraqê û Parlamentoya Kurdistanê di demekê de birêve bibin.

Roja Çarşemê 21ê Hezîrana 2023an, Serokwezîrê Herêma Kurdistanê Mesrûr Barzanî piştî pêşwazîkirina Nûnera Taybet a Sekreterê Giştî yê Neteweyên Yekbûyî ya li Iraqê Jeanine Hennis-Plasschaert, di twîtekê de ragihand: “Mafê xelkê yê hilbijartinan heye, ligel Nûnera Taybet a Sekreterê Giştî yê Neteweyên Yekbûyî, me behsa amadekariyan û piştevaniya li ser vê mijarê kir.”