Grûpên opozisyona Sûriyê yên ser bi Tirkiyê ve li navçeyên bakur û rojavayê Sûriyê, xwe amade dikin û li benda biryara hikûmeta Tirkiyê ne , daku êrîş bikin ser navçeyên di destê hêzên Kurdî de li Minbic û Til Rifetê.
Ew hêz xwe bi navê Artêşa Niştimanî dide nakirin, fermandarê wê, Ebdullselam Himêdî dibêje, ew amadene li dijî Minbicê dest bi operasyonê bikin.
Fermandarê Artêşa Niştimanî Ebdulselam Himêdî got: “Wek Artêşa Niştimanî bi taybet feyleqa 3, em amade ne şer destpê bikin û gundên dagîrkirî ji PKK, PYD, rêjîm û alîgirên wê bistîn in, em soz didin xwîşk û birayên xwe yên koçkirî ku di demeke nêzîk de ew ê vegerin gundên xwe.”
Demeke Tirkiyê gefên êrîşa bo ser Rojavayê Kurdistanê û navçeyên din ên Rêveberiya Xweser dike û dibêje ew dê bi kûrahiya 30 kîlometran wan navçeyên sînorî kontrol bikin, lê heta niha ne Rûsya û ne jî Amerîka li gel wê yekê ne.
Hevdem li gel van gefên Trikiyê Rêveberiya Xweser rewşa awarte ragihandiye û hêzeke zêde ya hikûmeta Sûriyê bihevahengî li gel Hêzên Sûriye Demokratîk gihiştiye Rojavayê Kurdistan û navçeyên din ên Rêveberiya Xweser ji bo rûbirûbûna her êrîşeke Tirkiyê bo ser wan navçeyan.
Ebdulselam Himêdî herwiha got: “Em dê ji tewerê Şaxê Zeytûnê ve destpê bikin heta Minbicê, wek gera yekem, herwiha em dê li benda gera duyem jî bin heta biryar bê dan.”
Ji 2016an ve Tirkiyê bi 4 operasyonan êrîşên xwe li nava axa Sûriyê pêk anîne bi alîkariya grûpên opozisyona Sûriyê, du ji wan li ser Rojavayê Kurdistanê bûn, têde bajarên Efrîn,Girê Spî û Serê Kaniyê dagîr kirin.
