Hat ragihandin ku Ramazan Pîşkînê ev 8 meh in çûye Stenbolê, ji aliyê kesên nasnameya wan nediyar ve dema nimêj dikir rastî êrişa bi kêrê hatiye.
Li gorî zanyariyan Ramazan Pîşkîn di êrişê de canê xwe ji dest daye.
Herwiha hate zanîn ku dê cenazeyê Ramazan Pîşkîn li Amedê bê veşartin.
Ji bo girtina êrişkaran polîsan lêpirsîneke berfireh daye destpêkirin.
Ramazan Pîşkîn ango 'Fîlozof Remezan' li Amedê di gel de gelek dihate hezkirin.
Pîşkîn bi hinceta ku derûniya wî ne baş e li Nexweşxaneya Fethî Sekîn Xarpêta Bakurê Kurdistanê demekê hatibû tedawîkirin.
Piştî ku Ramazan Pîşkînê 47 salî biribûn nexweşxaneyê li ser medyaya civakî nerazîbûn hatibûn nîşandan û bûbû rojev.
Parêzgariya Stenbolê li ser 'Fîlozof Remezan' daxuyanî da
Parêzgariya Stenbolê li ser bûyerê di daxuyanî da û tê de wiha de got:
“Ramazan Pîşkîn demjimêr 13:50î li çayxaneya xwe ya ku li navnîşana 88an a Kolana Kocamustafapaşayê ya Taxa Cerrahpaşayê ye, ji aliyê kesekî nasnameya wî nediyar ve rastî êrişê hat.
Pîşkîn ku ji singa xwe 3 derbên kêran wergirt û tîmên 112an (tîmên tenduristiyê) ew rakirin nexweşxaneyê tevî hemû midaxaleyan canê xwe ji dest da.
Xebatên eşkerekirina nasnameya kesê ku Pîşkîn kuştiye û girtina wî berdewam e.”
Dê li Amedê were definkirin
Xizmê Ramazan Pîşkîn Ahmet Arîf ji DHAyê re axivî û got:
“Rehmetî Ramazan kurê xaltiya min e. Min jî bihîst ku bi kêrê birîndar bûye, rakirine nexweşxaneyê û piştre jî miriye.
Piştî ku li nexweşxaneyê canê xwe ji dest da ew rakirin Tiba Edlî. Ji niha û şûnve dê were teşhîskirin.
Piştre em dê cenazeyê xwe wergirin û piştî karên pêwîst li Amedê defin bikin.
Bûyerek pir bi êş e. Mirovekî bê zirer bû. Xwedê bi rehma xwe şa bike.
Em gelekî xemgîn in. Înşallah derkeve holê. Bi baweriya min dadwerî û polîs lêkolînên pêwîst dikin. Înşallah encam bigirin.”
