Wezareta Karên Derve ya Tirkiyeyê li ser şerê HSD û beşeke Encûmena Leşkerî ya Dêrezorê got ku ew “rewşê ji nêzîk ve û bi nîgeranî dişopînin.”
Şer û pevçûnên dijwar ên di navbera Hêzên Sûriya Demokratîk (HSD) û beşeke Encûmena Leşkerî ya Dêrezorê û hinek eşîran de berdewam in.
Wezareta Karên Derve ya Tirkiyeyê li ser şerê di navbera HSD û Encûmena Leşkerî ya Dêrezorê de daxuyaniyek belav kir.
Wezareta Karên Derve ya Tirkiyeyê di daxuyaniya xwe de got:
“Ev kar beşeke hewildanên nû yên rêxistina terorî ne ku dixwaze gelên qedîm ên Sûriyeyê bi tundûtûjî, zext û guvaşê û binpêkirinên mafên mirovan bixe bin bandora xwe.
Em hêvî dikin ku ew kesên piştevaniyê dikin û di bin navê rûbirûbûna DAIŞê de armanc û niyeta rêxistina terorî pîne dikin jî bêyî ku dereng bimînin vê armanca rast a rêxistina terorî bibînin.
Daku Kurdên Sûriyeyê jî di nav de rê li ber êşandina zêdetir a pêkhateyên qedîm ên navçeyê bê girtin.”
Çi rû da?
Şeva yekşemê hêzên taybet ên Hêzên Sûriyeya Demokratîk (HSD) li parêzgeha Dêrezorê operasyoneke berfireh a bi navê “Xurtkirina Ewlehiyê” dabû destpêkirin.
Di operasyonên HSDyê de serokê Encûmena Leşkerî ya Dêrezorê Ehmed el-Xebîl Ebû Xewle û çend kesên nêzîkî wî hatibûn desteserkirin.
Piştî desteserkirina serokê Encûmena Leşkerî ya Dêrezorê Ehmed el-Xebîl Ebû Xewle, li herêmê alozî gur bûn.
Li ser vê yekê, alîgirên Ebû Xewle êrişî xalên HSDyê û Hêzên Ewlekariya Hundirîn kir.
Herwiha çekdarên din jî êrişî binkeya HSDyê ya li bajarokê El Besîrayê yê li gundewarê rojhilatê Dêrezorê kir.
Rêxistina Çavdêriya Mafên Mirovan a Sûriyeyê (SOHR) ragihandiye ku di şer û pevçûnan de heta niha herî kêm 52 kes hatine kuştin.
