HSD û Encûmena Leşkerî ya Dêrazorê 'Ebû Xewla' ji kar dûr dixin
Bi biryara Encûmena Leşkerî ya Dêrazorê û erêkirina Hêzên Sûriyeya Demokratîk (HSD), Ehemd El-Xebîl (Ebû Xewle) ji postê Fermandariya Encûmena Leşkerî ya Dêrazorê hat dûrxistin.
Navenda Ragihandinê ya HSDê îro 30î Tebaxa 2023an di daxuyaniyekê de ragihand, “Piştî demekê ji şopandinê, nirxandina gelek rapor û gazindên xelkê û li ser bingeha fermana girtinê ya ji aliyê Dozgeriya Giştî, Encûmena Leşkerî ya Dêrazorê û erêkirina Hêzên Sûriyeya Demokratîk biryar hat dayîn ku Ehmed El-Xebîl ji erkên xwe yên di rêveberiya Encûmena Leşkerî ya Dêrezorê de bê dûrxistin û dawî li erka wî bê anîn.”
Di daxuyaniyê de hat aşkerekirin, Ehemd El-Xebîl, ji ber pêkanîna gelek tawan, pêwendî û hevahengiya wî bi aliyên derve re, tawanan li dijî xelkê, bazirganiya madeyên hişbir, xirapiya birêvebirinê û rola wî di zêdebûna tevgera şaneyên DAIŞê de, bikaranîna cihê xwe ji bo berjewendiyên xwe û yên malbatî û binpêkirina sîstema navxweyî ya HSDê, hatiye dûrxistin.
Herwiha li gorî biryarê, erkên 4 kesên din di nava Encûmena Leşkerî ya Dêrazorê de ku rasterast bi van tawan û binpêkirinan ve girêdayî ne, hatin dûrxistin.
Ev biryara Encûmena Leşkerî ya Dêrazorê û HSDê derbarê Ehmed El-Xebîl de, piştî wê yekê tê, HSDê roja 27ê Tebaxê Fermandarê Encûmena Leşkerî ya Dêrazorê ya ser bi HSDê ve Ehmed El Xebîl (Ebû Xewla) û 4 kesên din girtibûn. Piştî vê yekê jî şer û alozî li Dêrazorê di navbera hin çekdarên Encûmena Leşkerî ya Dêrazorê û eşîrên Ereban de derketibûn.
Duhî jî hin çekdarên Encûmena Leşkerî ya Dêrazorê û eşîrên Ereban êrîşî çend xalên HSDê li Dêrazorê kirin û di encamê de jî 16 çekdarên eşîrên Erebî û 6 şervanên HSDê û 3 sivîl hatine kuştin û hejmarek kes jî birîndar bûbûn.
Herwiha êl û eşîrên Ereb li bakurê rojhilatê Sûriyê seferberiya giştî li dijî (HSD) ragihandin û 12 demjimêr dem ji bo azadkirina Ebû Xewla û girtiyên din, danbûn HSDê.
Her girêdayî vê mijarê jî, îro Encûmena Leşkerî ya Hicîn ya ser bi HSDê ve, gedexeya giştî li bakur û rojhilatê Dêrazorê ragihand.
Hêzên Sûriyeya Demokratîk (HSD) di 11ê Cotmeta 2015an de ji hevpeymaniya pêkhateyên Kurd, Ereb û Kildan û Aşûrî li Hesekê hate damezirandin û di nava wê de hejmarek ji encûmenên leşkerî hene.
