Roja Sêşemê 23-5-2023an, Serokê Komela Dadgeriya Kurdistanê Elî Bapîr di peyamekê de bi sernavê “Rewşa niha ya Herêma Kurdistanê û çend hişyarî ji bo hemû aliyan” belav kir û têde bi 4 xalan ku girêdayî civîna Parlamentoya Kurdistanê ya taybet bi çalakkirina komîsyona hilbijartinan a Herêma Kurdistanê ne, behsa rewşa Herêma Kurdistanê û metirsiyên li ser hebûna wê kir.
Xalên ku Elî Bapîr di peyama xwe de têkildarî rewşa Herêma Kurdistanê aîne, wiha ne:
-Şikandina heybeta saziyên Herêma Kurdistanê, sedema rûxandina Herêma Kurdistanê û bê îtibarkirina wê ye û dirûşmên bê çalakî jî bi kêrî kesî nayê û ti derdan çareser nake.
-Ji bo mana Herêma Kurdistanê divê em hemû pabendî prensîp û yasayan bin û nabe ti aliyek parlamento û hikûmetê weke ya xwe û partiya xwe bihesibîne, ji ber ku di rastiyê de Herêma Kurdistanê û saziyên wê yên hemû xelkê ne.
-Sepandina rewşeke taybet li ser Herêma Kurdistanê li dijî prensîbên pêkvejiyan, tifaq û lihevkirina niştimanî û rêzgirtina li hevdu ye û ti encameke baş bi dest naxe.
-Werin em ji xeletiyên xwe yên berê û rêveberiya nebaş a welatê xwe dersê bigirin û êdî em xwe şermezarî derdorê nekin. Divê em bizanin ku bêyî lihevkirineke niştimanî li ser çawaniya lidarxistina hilbijartinan, guhertina qanûnê û aktîvkirina komîsyonê bi awayekê ku ti guman li ser nebin, ti çareya me ya din nîne. Hatiye gotin jî yê ku bi edaletê nerihet be, dê bi zor û zordariyê bêtir nerihet be.
Roja Duşemê 22ê Gulana 2023an ji ber di civîna Parlamentoya Kurdistanê de bêyî razîbûna Seroka Parlamentoyê û Fraksyona YNKê, mijara çalakkirina komîsyonê di bernameya karê parlamentoyê de hat danîn, di navbera parlamenterên herdu fraksyonên YNK û PDKê de alozî derketibû.
YNK dibêje, Seroka Parlamentoyê civîn ji bo demeke nediyar paşxistiye û berdewamîdana bi civîna roja Duşemê û biryarên di civînê de ne qanûnî û ew qebûl nakin.
Lê belê Fraksyona PDKê dibêje, di civîna roja Duşemê de bi dengê 58 endamên parlamentoyê Komîsona Hilbiajrtinan û Rapirsiyê ya Herêma Kurdistanê hatiye çalakkirin.
Li aliyekî din, Rojnameya Fermî ya Herêma Kurdistanê îro biryara çalakkirina Komîsona Hilbiajrtinan û Rapirsiyê ya Herêma Kurdistanê belav kir.
