Konsulê Giştî yê Amerîka yê li Hewlêrê Irvin Hicks Jr. diyar kir, îsal jî serdanên rayedarên payebilind ên welatê wî bo Herêma Kurdistanê berdewam dibin û got: “Hatina rayedarên payebilind ên Amerîkayê bo Herêma Kurdistanê û avakirina konsulxaneya herî mezin welatê me, nîşaneya wê yekê ye ku em ê li Herêma Kurdistanê bimînin.”
Irvin Hicks Jr. îro Çarşemê 4ê Çileya 2023an di konferanseke rojnamevanî de bal kişand ser rêkeftina navbera Wezareta Berevaniyê a Amerîkayê û Wezareta Pêşmerge û ragihand: “Em dixwazin Pêşmerge li ser lingên xwe bisekine û rûbirûyî gef û metirsiyên DAIŞê bibe. Eger gefên DAIŞê dawî bibe, xelkê ku aware bûne, bi dilniyayî dikarin vegerin cih û warên xwe.”
Konsulê Giştî yê Amerîka yê li Hewlêrê destnîşan kir: “Em pêşwaziyê li hevahengî û xebata hevbeş a Wezareta Pêşmerge ligel tîma me ya serbazî dikin, da ku gefên DAIŞê dubare nebin û em di parastina welatiyên vê herêmê de dilniya bin.”
Hicks Jr. li ser pêwendiyên navbera Hewlêr û Washingtonê de diyar kir: “Sala derbasbûyî çendîn rayedarên payebilind ên Amerîkayê serdana Herêma Kurdistanê kirin û îsal serdan dê berdewam bin. Ev pêwendî û têkiliya Amerîkayê ya ligel Herêma Kurdistanê heye, di asta bilind a wezaretan û kongresman de ye.”
