Li gor daxuyaniya Serokatiya Herêma Kurdistanê, di civînê de Nêçîrvan Barzanî û Balyozê Fransayê pêşhatên dawî yên rewşa siyasî û emnî ya Iraqê, hewlên ji bona hilbijartina Serokkomarê Iraqê, pêkanîna hikûmeta nû ya Iraqê, têkiliyên di navbera Hewlêr û Bexdayê de, rûbirûbûn, metirsî û gefên DAIŞê li deverên maddeya 140, pêşhatên devera Şingalê û rewşa Herêma Kurdistanê û hilbijartInên paşerojê gotûbêj kirine.
Balyozê Fransayê jî di hevdîtinê de ragihand, welatê wî dixwaze têkiliyên xwe yên bi Iraq û Herêma Kurdistanê re xurt û berfireh bike û diyar kir, aramî û istiqrara Iraqê ji bo parastina aramiya herêmê pêdivî û girîng e.
Di daxuyaniyê de herwiha tê gotin, Nêçîrvan Barzanî amaje bi pirsgirêkên navbera Herêma Kurdistanê û Iraqê kir û got, “çareserkirina pirsgirêkên di navbera Hewlêr û Bexdayê kilîda aramî û istiqrara Iraqê ye”, û destnîşan kir, hebûna mekanîzmekê ji bo danûstandin û çareserkirina pirsgirêkên heyî pêwîst e.
Her du alî li ser pêdivî û girîngiya berdewamiya hevkarî û hemahengiya di navbera Pêşmerge û artêşa Iraqê de bi pîştevaniya hêzên Hevpeymaniya Navdewletî ji bo rûbirûbûna gef û metirsiyên DAIŞê bi taybet jî li deverên maddeya 140 a destûra Iraqê hemfikir bûn.
Serokatiya Herêma Kurdistanê ragihandiye, “rewşa herêmî bi giştî, hewlên ji bona cêgîrkirina bazara enerjiyê, pêgeh û girîngiya Rojhilata Navîn di vî warî de û têkiliyên Herêma Kurdistanê ligel dewletên cîran” jî di hevdîtinê de hatin nirxandin.
Di civînê de Konsulê Giştî yê Fransayê yê li Hewlêrê Olivier Decottignies jî amade bû.
