Serokê Herêma Kurdistanê Nêçîrvan Barzanî û şandeke Parlamentoya Almanyayê li ser rewşa siyasî ya Iraqê û kêşeyên Hewlêr û Bexdayê gotûbêj kirin.
Di civînekê de ku, Wezîrê Pêşmerge yê Hikûmeta Herêma Kurdistanê jî amade bû, peywendiyên Almanya yên ligel Iraq û Herêma Kurdistanê, erkê hêzên Almanyayê di çarçoveya Hevpeymaniya Navdewletî ya li dijî DAIŞê li Iraq û Herêma Kurdistanê, rewşa siyasî ya Iraqê, pirsgirêkên navbera Hewlêr û Bexdayê, pirsên girêdayî mafê mirov û azadiya li Herêma Kurdistanê hatin gotûbêjkirin.
Nêçîrvan Barzanî dupat kir ku, DAIŞ li Iraq û Sûriyê hê jî gefeka rasteqîn e û ji bo jinavbirina terorê Iraq û Herêma Kurdistanê hê jî pêwîstî bi alîkarî û piştevaniya navdewletî heye, ji ber vê yekê Nêçîrvan Barzanî hêvî xwest ku Parlamentoya Almanyayê di meha cotmeha bê de biryarê li ser dirêjkirina erkê hêzên welatê xwe li Iraq û Herêma Kurdistanê bide.
Nêçîrvan Barzanî li ser navê Herêma Kurdistanê ji bo alîkariyên mirovî û leşkerî bo Iraq û Herêma Kurdistanê spasiya Almanyayê kir û tekezî li ser wê yekê kir ku Iraq û Herêma Kurdistanê ji bo pêşxistina sazî û demokrasiyê û ber bi pêşvebirina prensîpên mafên mirovan û azadiyan pêwîstî bi Ewrûpiyan heye û ew dikarin di vê warî de alîkariya me bikin.
Tevî bilind nirxandina rola Herêma Kurdistanê û qehremaniya Pêşmerge di têkşikandina DAIŞê de, şanda mêvan matmayîna xwe ji pêşketin û avadaniya Herêma Kurdistanê nîşan da û kêfxweşiya xwe jî nîşan da ku piştî têkşikandina terorîstan proseya avadanî û veberhênanê dest pê kiriye.
Herwiha tekezî li ser dostayetiya Almanya ligel Iraq û Herêma Kurdistanê kirin û aştî û aramiya Iraqê ji bo navçeyê bi giştî bi girîngî zanî.
Hevahegiya navbera arteşa Iraq û Pêşmergeyê Kurdistanê, rewşa herêmî bi giştî û çend mijarên din yên cihê girîngîdana hevbeş jî gotûbêj kirin.
