Hat zanîn ku dê Serokê Herêma Kurdistanê Nêçîrvan Barzanî jî beşdarî kongreyê bibe û gotarekê pêşkêş bike.
Li gorî zanyariyên ku ketine destê Rûdawê, sibê dê Nêçîrvan Barzanî ji bo beşdarî 5emîn Kongreya YNKyê biçe serdana Silêmaniyê.
Li gorî çavkaniyên Serokatiya Herêma Kurdistanê ji Rûdawê re ragihandine, dê Nêçîrvan Barzanî di kongreyê de gotarek pêşkêş bike.
27ê Îlonê bi beşdariya 600 delegeyan dê 5emîn kongreya YNKyê li Silêmaniyê bê lidarxistin.
Yekîtiya Niştimanî ya Kurdistanê (YNK) di 1ê Hezîrna 1975an de li Şamê hat damezirandin.
Herwiha YNK endamê Sosyalîst Enternasyonalê ye jî.
Lê YNKyê 17 sal piştî damezrandina xwe di sala 1992yan de li Hewlêr û Silêmaniyê yekemîn kongreya xwe bi beşdariya 793 delegeyan li dar xist.
Piştre di sala 2001ê de bi beşdariya hezar û 247 delegeyan kongreya duyemîn li Silêmaniyê hat lidarxistin.
Partiyê piştî 9 salan di sala 2010an de bi beşdariya hezar û 500 endam û delegeyan 3yemîn kongreya xwe pêk anî.
Piştî wefata damezrînerê partiyê, Sekreterê Giştî Celal Talebanî, di sala 2019an de 4emîn kongreya YNKyê bi beşdariya zêdetirî hezar endam û nûneran hat lidarxistin û derbasî sîstema hevserokatiyê bû.
