Nêçîrvan Barzanî: Hikûmeta Iraqê divê rê nede êrişên mûşekî

Duh 1ê Gulana 2022an bi şev 6 mûşek li sînorê navçeya Xebat a Hewlêrê ketin xwarê.

Nêçîrvan Barzanî li ser mûşekên hatin avêtine Xebatê daxûyaniyek belav kir û diyar kir ku êrîşa mûşekan bi tundî şermezar dike û daxwaz ji aliyên peywendîdar yê Hikûmeta Iraqê dike ku encamderên êrîşê bibîne û ceza bike.

Serokê Herêma Kurdistanê di beşeke din a daxûyaniya xwe de got, "Şermezarkirina van êrîşan têrê nake, dubarebûna van êrîşan gefên cidî ne li ser ewlekarî û aramiyê."

Hikûmeta Herêma Kurdistanê diyar kir ku mûşekan zerareke madî û canî negihandiye û ji nahyeya Bertileya Hemdaniye ya parêzgeha Neynewayê hatine avêtin.

Piştî êrîşa bi mûşekan, medyaya ewlekariya Iraqê ragihand ku wan platformeke mûşekan û 4 mûşek, li nêzî gundê Fazliye ya li sînorê Başîk a parêzgeha Neynewayê bi dest xistine.