Serokwezîr Mesrûr Barzanî: Em sîstema Desteberiya Civakî rêk dixin

Serokwezîr Mesrûr Barzanî li ser hejmara xwe ya Twitterê diyar kir: “Em rêkxistinê di Desteberiya Civakî de dikin, da ku bibe nimûneyek ji bo hemû navçeyê.”

Mesrûr Barzanî destnîşan kir: “Sîstemeke giştgîr û berdewam ku asta xweşguzeraniya karkeran bilind dike, veberhênanê zêdetir dike, herwiha roleke wê ya mezin dibe di geşepêdana demdirêj a civakî û aborî ya Kurdistanê de.”

Îro 14ê Hezîrana 2023an Serokwezîr Mesrûr Barzanî serdana Rêveberiya Giştî ya Kar û Desteberiya Civakî ya li Hewlêrê kir û li ser dîjîtalkirina arşîva vê rêveberiyê got: “Armanca vê yekê ew bû ku em karibin van hemû belgeyan dîjîtal bikin û karûbaran hêsan bikin, hem ji bo hikûmetê û hem jî ji bo karkeran.”

Herwiha destnîşan kir: “Ev, bêguman gelek alîkariya karkeran dike. Di heman demê de parên ku tên komkirin ne bac e, belkû ewlehiya civakî ye, tenê ji bo garantîkirina paşeroja wan kesan e ku di sektora taybet de dixebitin.”