Fermandarê Hêzên Parastina Êzidxanê Heyder Şeşo, ji Tora Medyayî ya Rûdawê re got:
“Şeva borî bi dronê êrişî Şigalê hat kirin û hinek kes hatin kuştin.
Cihê ku êrişî hatiye kirin 8 kîlometreyan dûrî Xanesorê ye û em nizanin çend kes hatine kuştin.”
Li gorî agahiyan, di êrişê de gundê Kerkê hatiye bombebarankirin. Ev gund li herêma Barê ye û nêzîkî Çiyayê Şingalê ye. Herwiha 8 kîlometreyan dûrî nahiyeya Xanesorê ye.
“Karker bûn hedef”
Li aliyê din, Rêveberiya Xweser a Şingalê di daxuyaniya xwe ya li ser êrişê de amaje pê kir ku Tirkiyeyê ev êriş kiriye û da zanîn:
“Di vê êrişê de karkerên ku li konekî diman bûn hedef. Wan karkeran bîreke avê dikolan. 5 karker hatin kuştin, 2 kes jî birîndar bûn.”
Li aliyê din, Heyder Şeşo destnîşan kir ku ew nizanin çend kesan canê xwe ji dest daye û nizanin kesên hatine kuştin şervan bûn an sivîl.
Rêveberiya Xweser a Şingalê ragihand ku ew dê îro li ber Meclîsa Gel a Xanesorê çalakiyeke protestoyê li dar bixin.
