Ciwanekî bi navê Ezîz Zeynelabîdîn Îbrahîm ê 38 salî ku şofêrê teksiyê ye 29ê Gulana 2023an di demjimêr 07:00an de winda bû. Piştî 5 rojan ji windabûna wî, teksiya wî li derveyî Zaxoyê hat dîtin. Ezîz Zeynelabîdîn Îbrahîm şeva borî di demjimêr 00:00an de bi birîndarî vegeriya mala xwe.
Îbrahîm Zeynelabîdîn ê birayê Ezîz ji Ajansa Rûdawê re got, “Pirsgirêka me bi tu kesî re nîne, di 29ê Gulanê de kesekî telefonî birayê min kir û heman rojê di demjimêr 19:00an de telefona wî hat girtin û winda bû. Me yekser hişyarî da hêzên ewlekariya Zaxoyê û 5 rojan piştî windabûna birayê min, me teksiya wî li biyabaneke derveyî navenda Zaxoyê dît.”
Îbrahîm Zeynelabîdîn li ser vegera birayê xwe jî got, “Birayê min şeva borî di demjimêr 00:00an de bi birîndarî ku lêxistibûn vegeriya mala xwe, westiyayî bû û nikaribû biaxive, tenê got ku ew 7 roj in ji aliyê çend kesan ve rastî lêdanê hatiye û ji aliyê hêzên ewlehiyê ve ji bo nexweşxaneyê hatiye birin û niha di bin çavdêriyê de ye.”
Birayê Ezîz daxwaza mafê birayê xwe dike û daxwaz dike ku kesê ku roja windabûnê telefonî wî kiriye, were eşkerekirin û ew grûpa ku di wan 7 rojan de li wî xistine, were eşkerekirin da ku mafê birayê wî winda nebe.
Ezîz Zeynelabîdîn Îbrahîm 10 sal in zewicî ye û li navenda bajarê Zaxoyê dijî, 8 sal in şofêrtiya teksiyê dike.
