11 wezîr û sê cîgirên Serokwezîr baweriya Parlamentoya Îraqê bi dest xist

Parlamentoya Îraqê di rûniştineke taybet de bawerî da wezîrên nû yên kabîneya Elî Falih Zeydî û dawî li dosyeya wezaretên vala anî.

Di rûniştinê de sê alîkarên serokwezîr hatin diyarkirin û çend wezaretên nû jî hatin pesendkirin.

Parlamentoya Îraqê bi piraniya dengan temamkirina kabîneya wezîran pesend kir.

Ev yek di demekê de ye ku çend mehan beşek ji wezaretan bi wekalet dihatin birêvebirin.

Alîkarên Serokwezîrê Îraqê

Parlamentoyê ji bo posta alîkarê serokwezîr bawerî da sê kesan:

- Muhsîn Mendelawî

- Leys Xezelî

- Mihemed Temîm

Di heman demê de namzedê çarem ê ji bo posta alîkarê serokwezîr Faris Brîfkanî nekarî dengên pêwîst bi dest bixe û dengdana ji bo wî hat bipaşxistin.

Wezîrên nû yên ku hatin diyarkirin

Li gorî dengdana parlamentoyê ev kes wekî wezîrên wezaretên xizmetguzarî û serweriyê hatin diyarkirin:

Wezîrê Karên Navxwe: Yasir Malikî

Wezîrê Parastinê: Nayif Şemerî

Wezîrê Plankirinê: Quteybe Hemîd

Wezîrê Xwendina Bilind: Heyder Husênî

Wezîrê Rewşenbîriyê: Yasîn Îsawî

Wezîrê Avadankirin û Niştecîkirinê: Rêbaz Hemlan

Wezîrê Kar û Kar û Barên Civakî: Mihemed Mûsewî

Wezîrê Ciwan û Werzişê: Sefa Kînanî

Sê wezaretên nû hatin zêdekirin

Di civînê de sê wezaretên nû hatin pesendkirin û wezîrên wan dest bi kar kir.

Ehmed Deracî bû Wezîrê Aboriya Dîjîtal, Elî Dexîlî bû Wezîrê Geştûguzariyê û her wiha Mihemed Semaan wekî Wezîrê Dewletê hat diyarkirin.

Tevî pesendkirina kabîneyê jî hejmarek fraksiyonên siyasî rûniştin boykot kir.

Wan diyar kir ku zêdekirina wezaret û postên nû barekî giran ê darayî ye û bi plana reforma aborî ya welêt re nagunce.

Li gorî agahiyên nûçegihanê Rûdawê yê li Parlamentoya Îraqê, ji ber nakokiyên di navbera aliyan de dengdana li ser Wezîrê Koç û Koçberan ji bo demek din hat paşxistin.

Sedema valamana postên wezaretan çi bû?

Elî Falih Zeydî beriya zêdetirî çar mehan hikûmeta xwe ava kiribû lê ji ber rikeberiya siyasî û vetoya hinek aliyên navneteweyî, neh wezaret û postên alîkarê serokwezîr vala mabûn.

Yek ji postên herî hestiyar namzediya Leys Xezelî ya ji bo alîkarê serokwezîr bû ku berê navê wî di lîsteya cezayan a Amerîkayê de bû.

Lêbelê aliyên siyasî ragihand ku wan karî wan astengan derbas bikin û ji bo temamkirina kabîneyê li gel aliyên navneteweyî bigihin lihevkirinê.