Hakan Fîdan îro digihe Hewlêrê

Wezîrê Derve yê Tirkiyê Hakan Fîdan dê îro danê êvarê bigihe Hewlêrê û siba pêncşemê bi berpirsên bilind ên Herêma Kurdistanê re dest bi hevdîtinan bike. Di civînan de, dê çend mijarên girêdayî Enqere û Hewlêrê, bi taybetî hinardekirina petrola Herêma Kurdistanê bên gotûbêjkirin.

Şeva borî piştî civîna ligel Wezîrê Derve yê Iraqê Fuad Husên; Wezîrê Derve yê Tirkiyê Hakan Fîdan îro danê sibê li Koşka Selam a Bexdayê bi Serokomarê Iraqê Letîf Reşîd re civiya. Di hevdîtinê de têkiliyên Tirkiye û Iraqê û mijarên din dê bên gotûbêjkirin.

Biryar e Hakan Fîdan piştî civîna bi Serokomarê Iraqê re, bi Serokwezîrî Iraqê Mihemed Şiya Sûdanî û Serokê Parlamentoya Iraqê Mihemed Helbûsî re bicive.

Piştî civînên wî yên li Bexdayê; Wezîrê Derve yê Tirkiyê Hakan Fîdan dê îro danê êvarê bigihe Hewlêrê û ligel berpirsên payebilind ên Herêma Kurdistanê bicive. Li gorî agahiyan, Hakan Fîdan bi awayekî cuda ligel Serok Barzanî; Serokê Herêma Kurdistanê Nêçîrvan Barzanî û Serokwezîr Mesrûr Barzanî bicive.

Ev serdana Hakan Fîdan wek amadekariyekê ji bo serdana Serokomarê Tirkiyê Recep Tayyip Erdogan bo Iraq û Herêma Kurdistanê ye, ku heta niha bi fermî ji aliyê Enqere û Bexdayê ve nehatiye aşkerekirin.

Serdana Hakan Fîdan bo Herêma Kurdistanê girîng e

Berdevkê Hikûmeta Herêma Kurdistanê Pêşewa Hewramî şeva borî di dema beşdarbûna di bernameya “Basî Roj” a K24 de, behsa serdana Hakan Fîdan bo Herêma Kurdistanê kir û got: “Herêma Kurdistanê bi cidî dixwaze ku têkiliyên wê yên erênî bi welatên cîran re hebin û dixwaze van peywendiyan li ser astên cuda bipêş bixe. Tirkiye yek ji wan welatan e ku hevsînorê Herêma Kurdistanê û pêwendiyên me yên dîplomatîk û bazirganî bi wan re hene.”

Hewramî da zanîn, Herêma Kurdistanê beriya ku bibe beşek ji nexşeya enerjiyê ya cîhanî, Herêmek e di destûrê de hatiye naskirin û got, li ser vê bingehê, pêwendiyên Tirkiyê yên erênî ligel Herêma Kurdistanê hebûn. Ev peywendî piştî pêşketina enerjiyê li Herêma Kurdistanê jî, zêdetir bipêş ketin.