Civîna MGKyê bi dawî bû: Ji Sûriyeyê heta Xezeyê rojev çi bû?

Di daxuyaniya piştî civînê de bal hat kişandin ser armanca "Tirkiyeya Bêteror" û hat gotin, "Di paşeroja herêma me de cihê teror û tundiyê nîne."

Civîna MGKyê bi serokatiya Serokkomarê Tirkiyeyê Recep Tayyîp Erdogan li koşka Serokkomariyê hat lidarxistin û 2 demjimêr û 15 xulekan ajot.

Di civînê de mijarên wekî qonaxa ku di pêvajoya "Tirkiyeya Bêteror" de hatiye gihiştinê, xebatên Komîsyona Piştgiriya Neteweyî, Biratî û Demokrasiyê ya ku li Parlamentoya Tirkiyeyê hatiye avakirin, bûyerên li Sûriye û Sûdanê, agirbesta li Xezeyê, Şerê Rûsya û Ukraynayê û rewşa dawî ya pêvajoya aştiyê ya di navbera Azerbeycan û Ermenistanê de hatin gotûbêjkirin.

Daxuyaniya 7 xalî ya MGKyê

Piştî civînê Serokatiya Ragihandinê ya Serokkomariya Tirkiyeyê daxuyaniyeke ku ji 7 xalan pêk tê belav kir.

Xalên daxuyaniyê wiha ne:

1 - Derbarê operasyon û çalakiyên ku li navxwe û derveyî welêt li dijî rêxistinên wekî PKK/KCK-PYD/YPG, FETO û DAIŞê û gefên li ser yekîtiya neteweyî tên birêvebirin de zanyarî hatin pêşkêşkirin.

2 - Di çarçoveya armanca "Tirkiyeya Bêteror" de, xebatên piralî yên ji bo bidawîkirina terorê bi awayekî tam û mayînde û xurtkirina yekîtî û hevgirtina neteweyî hatin nirxandin; hat tekez kirin ku di paşeroja herêma me de cih ji ti awayê teror û tundiyê re nîne.

3 - Kêfxweşiya ji ber bipêşketinên cîranî me Sûriyeyê yên ji bo gihiştina pêgeha navneteweyî ya ku heq dike û tevkariya li aramiya herêmê hat anîn zimên; hat diyarkirin ku Tirkiye dê piştgiriya xwe ya ji bo aramî, refah û ewlehiya hemû beşên gelê Sûriyeyê yê bira bidomîne.

4 - Hat destnîşankirin ku agirbesta li Xezeyê ku Tirkiye jî yek ji mîmarên wê ye, ji bo rawestandina komkujiya li herêmê xwedî girîngiyeke jiyanî ye; li gel vê yekê bangî rêveberiya Îsraîlê hat kirin ku divê demildest dawî li êrişên xwe yên ku agirbestê bin pê dikin bîne û berpirsyariyên xwe bi cih bîne. Hat ragihandin ku Tirkiye amade ye di pêvajoya bê de jî ji bo parastina aştî û aramiyê û jinûveavakirina Xezeyê rol bigire ser xwe.

5 - Bipêşketinên li Sûdanê hatin nirxandin; piştgiriya ji bo serwerî û yekparçeyiya axa wî welatî hat teyîdkirin û bangî aktorên navneteweyî hat kirin ku ji bo bidawîkirina komkujiyên li dijî sivîlan û rawestandina şer hevkariyê bikin.

6 - Rewşa dawî ya Şerê Rûsya û Ukraynayê hat nirxandin, li hemberî rîska gurkirina şer bal hat kişandin ser girîngiya lêgerînên çareseriya dîplomatîk; hat tomarkirin ku Tirkiye dê hewlên xwe yên ji bo aştiyeke dadmend û mayînde bi hevkarên xwe yên navneteweyî re bidomîne.

7 - Di çarçoveya bipêşketinên erênî yên di navbera Azerbeycan û Ermenistanê de derfetên hevkariya dualî û herêmî hatin gotûbêjkirin; îradeya Tirkiyeyê ya ji bo dabînkirina aştî, aramî û bipêşketinên li Kafkasyaya Başûr hat teyîdkirin.