Mesrûr Barzanî êrişên li ser balafirgehên Erebistana Siûdî şermezar kirin

Mesrûr Barzanî da zanîn ku êrişkirina li ser xelkê sivîl û binesaziya sivîl "bi ti awayî nayê qebûlkirin."

Serokwezîrê Herêma Kurdistanê Mesrûr Barzanî doh înê li ser hesabê xwe yê tora civakî ya Xê got:

"Ez êrişên li ser Balafirgeha Navneteweyî ya Şah Xalid a li Riyadê û Balafirgeha Navneteweyî ya Ebhayê şermezar dikim. Êrişkirina li ser xelkê sivîl û binesaziya sivîl nayê qebûlkirin."

Mesrûr Barzanî her wiha got, "Ez sersaxiyê ji malbatên qurbaniyan re dixwazim û em hevxemiya xwe bi gel û serkirdayetiya Şahnişîna Erebistana Siûdî re radigihînin."

Di êrişan de 3 kesan canê xwe ji dest da

Desteya Giştî ya Firokevaniya Sivîl a Siûdî îro bi daxuyaniyekê ragihand ku Hûsiyan bi rêya mûşek û dronan êrişî Balafirgeha Şah Xalid a li Riyadê û ya Ebhayê ya li başûrê welêt kiriye.

Li gorî daxuyaniyê, di encama êrişan de 3 kesan canê xwe ji dest da û 36 kesên din jî birîndar bûn.

Nasnameya qurbaniyan

Desteyê eşkere kir ku di êrişa li ser Balafirgeha Navneteweyî ya Ebhayê de du jinên bi eslê xwe Mexribî û Cezayîrî canê xwe ji dest daye.

Di wê êrişê de 28 kesên din jî birîndar bûn ku piraniya wan welatiyên Siûdî ne, her wiha du kesên ji Bengladeş û Fîlîpînê jî di nav birîndaran de hene.

Li aliyê din, di êrişa li ser Balafirgeha Navneteweyî ya Şah Xalid a li Riyada paytext de jî welatiyekî Sûdanî canê xwe ji dest daye û 8 kes birîndar bûne.

Hat destnîşankirin ku 5 welatiyên Siûdî, 2 Misirî û Pakistaniyek birîndar bûne.

Ji bilî zererên canî, zerer gihîştiye beşek ji avahî û sazgehên her du balafirgehan jî.