Nêçîrvan Barzanî û Supasalarê Brîtanyayê rewşa Iraq, Herêma Kurdistanê û navçeyê gotûbêj dikin
Serokê Herêma Kurdistanê Nêçîrvan Barzanî îro 12ê Berçile pêşwazî li Admiralê Brîtanî Sir Anthony Radakin û şandeke pilebilind a leşkerî û dîplomatîk a pê re kir.
Di daxuyaniya Serokotiya Herêma Kurdistanê de hat, di civînê de ku Cîgirê Serokê Herêma Kurdistanê Şêx Cefer Şêx Mistefa, Wezîrê Karûbarên Pêşmerge, Supasalarê Pêşmerge û Balyozê Brîtanya li Iraqê amade bûn, rewşa niha ya Iraq û Herêma Kurdistanê, pêşhatên bilez ên navçeyê bi taybetî li Sûriyeyê û rola Hevpeymaniya Navdewletî di şerê li dijî DAIŞê de hatin gotûbêjkirin, herwiha pêwendiyên Brîtanya li gel Iraq û Herêma Kurdistanê hatin behskirin.
Nêçîrvan Barzanî rol û berdewamiya piştevaniya Brîtanya li Iraq û Herêma Kurdistanê bilind nirxand. Herwiha spasiya hêzên Brîtanyayê jî kir ku di proseya çaksaziyê li Wezareta Pêşmerge û yekxistina Pêşmerge de, alîkariya Herêma Kurdistanê kirine.
Ji aliyê xwe ve, Admiral Radakin pabendbûna welatê xwe ji bo zêdetir piştgirî û bihêzkirina hevkariyên hevbeş ligel Iraq û Herêma Kurdistanê tekez kir. Herwiha amaje bi giringiya berdewamiya hevkarî û hevahengiyê ji bo piştrastbûna ji rûbirûbûn û serkeftina li dijî metirsiya terorê û parastina aramiyê li navçeyê kir.
Herwiha di hevdîtinê de, çendîn mijarên din ên cihê giringiya her du aliyan jî hatin gotûbêjkirin.
Nûvekirina herî dawî: 07:13:19
