NPGyê da zanîn ku di hezar û 712 çalakiyên gerîlayên wan de 928 leşkerên Artêşa Tirkiyeyê hatine kuştin û li beramber 179 gerîlayên wan jî canê xwe ji dest daye.
Fermandariya Biryargeha Navenda Parastina Gel (NPG) ku ser bi Partiya Karkerên Kurdistanê (PKK) doh bi daxuyaniyekê bîlançoya şerê wan ê sala 2023yan ligel Artêşa Tirkiyeyê eşkere kir.
Li gorî daxuyaniyê gerîlayên PKKyê sala 2023yan bi giştî hezar û 712 çalakî li dijî leşkerên Tirkiyeyê pêk anîne.
Di wan çalakiyan de 928 leşker hatine kuştin ku 7 ji wan fermandarên pile bilind in û 128 leşker jî birîndar bûne.
Fermandariya Biryargeha Navenda Parastina Gel (NPG) ragihand ku li beramber kuştî û birîndarên Artêşa Tirkiyeyê, 179 gerîlayên wan jî canê xwe ji dest daye ku 75 ji wan li Bakurê Kurdistanê û 104ê wan jî li Başûrê Kurdistanê bûne.
Herwiha 2 gerîla jî wek dîl ketine destê Artêşa Tirkiyê.
Fermandariya Biryargeha Navenda Parastina Gel eşkere kir ku Artêşa Tirkiyeyê sala 2023yan bi giştî 2 hezar û 969 caran êrişî gerîlayên wan kiriye.
Hezar û 580 ji wan bi balafirên şer bûne. Ji êrişên bi balafirên şer hezar û 38 ji wan bi teqemeniyên qedexekirî û çekên kîmyayî hatine kirin.
342 ji wan jî bi dronan û 9 ji wan jî bi bombeyên taktîkê yên atomî hatine kirin.
Li aliyê din Wezareta Parastinê ya Tirkiyeyê 28ê Kanûna Pêşîna 2023yan ragihandibû ku sala 2023yan di êrîş û operasyonên wan ên li Başûr û Rojavayê Kurdistanê de 2 hezar û 201 gerîlayên PKKyê û şervanan canê xwe ji dest daye.
